黃色經濟圈的實際操作考慮

黃色經濟圈的實際操作考

反修例運動已經持續5個多月，呢5個幾月由個個星期的遊行集會，到現在日日天都未黑已經又拉又打，拉嘅已經唔單單係示威者，而係街坊。晚晚似係戒嚴宵禁又唔敢正名嘅情況，嚴重係實際層面同精神層面打擊消費。我們作為小商戶，租又要交，但晚晚封地鐵，冇客可以黎到消費，個個星期一入夜拉人，也沒有客人敢在街上冒險。事件去到現在，由於非必要的服務同消費行業難以維持，所以「黃色經濟圈」就開始受大眾注視，以支撐因為運動而帶來生意壓力的「黃店」，原意是救救同路的商戶，拒絕把鈔票送到藍絲手中，慢慢也能在支援前線和被捕人士的就業問題上帶來界外效應 （Externalities）。

大家都知窮生對運動的關注，所以我經常考慮自己有冇野可以為香港做多一點，今日以自己嘅分析同知識去為「黃色經濟圈」的操作落墨，實為少少心意。

黃店難定義？
這是一個很直接簡單就能明白的實際操作問題，政治立場是很複雜的東西，5大訴求3個都收貨是不是黃店?一間舖頭老闆係黃員工係藍，間舖頭係黃店定藍店？這在主流的藍黃商戶分類apps/網站都係靠市民自發報告，當中真假難分，亦冇標準以致實際操作黃色經濟圈的接觸面一直都不大，再衍生很多操作下的問題，下面會再講。

我建議有關人士可以訂立一套客觀的準則，不是道聽途說。一來減低fact check的成本，二來避免「殺錯良民」，把更多人/商戶拉到「黃色經濟圈」內。在實際意義上黎講，我地唔需要知道商戶係唔係真心相信黃絲的價值，我地亦證明唔到。黃色經濟圈的發展應該係做成風氣，大家想賺黃絲的錢，就是明顯表示支持。我認為其中比較理想的標準是在單據清楚寫明立場，所謂有單有據冇走雞！這樣扮黃的成本很重，因為個個幫襯完都有單留低，有咩時show返張單出黎，一方面這已經成為一分支持「黃色經濟圈」的力量，已經冇得改變。另一方面，大家諗下如果有日有好多張寫住五大訴求，缺一不可嘅美心酒樓單據出現，佢水洗都唔清啦！黃色經濟圈目標唔係要捉鬼，而家希望市道一片黃，做到標準，佢個心點諗，其實唔重要。

黃色經濟「圈」不是　黃色經濟「點」
上一段講到真假難分會衍生很多操作下的問題，其中一個就係呢個問題。所謂「圈」就是一個接觸面大而且環環相扣的共同體。例如飲野可以去清玉，食野去水門雞飯勉強算係一個圈。但由於資訊不足，真假難分。大家因為怕去錯而只集中一兩間黃店的情況非常嚴重。大家可以見到龍門日日排長龍，加藤屋做到踢哂腳。但係，其他黃店少有人講，得唔到「黃色經濟圈」的實際成效，淪為「打卡」活動，長此下去大部份黃店仍然難以維持。

另一個不能成「圈」的問題就是消費鏈的問題。我地好似只係識飲飲食食，而事實上好多其他黃店在其他行業，可能會樓上經營，也嚴重影響生意，叫緊救命。已經到了11月的今日，大家是否應該開始把黃色經濟圈由街舖，由食肆再向下推深一兩層到診所、零售、剪頭髮、娛樂、教育…..等等不同範疇的產業之中，把「點」連成「圈」？
給別人「綠」的自由
雖說現在的香港實在沒有中間，但生意始終是生意，老闆心裡黃，也未必一定有能力宣之於口。衰啲講句，佢講唔出，都係因為大家「懲罰」得佢唔夠。生活壓力是現實的，「黃色經濟圈」威力未到，點可能叫人人捨身成仁？

所以，大家可以支持黃幫襯藍罷買，但請容許「綠」的自由，甚至可以慢慢令該商戶依靠黃的經濟，令他們放心變黃，而不是口出惡言，硬要把綠店迫成藍店，把力量推到對家手中。

黃的擴散
要系統化「黃色經濟圈」，最重要是把黃店散到各行各業，而不是對別人立場的不斷抽秤。大家要知道，做餐廳的可以黃，佢地嘅供應商都好難完全係黃，好似做網上商店的「光時」，作為超市可不可以所有貨品都來自黃店？冇可能吧？但如果呢d黃店可以企得穩，日後就可以慢慢改落返供應商轉頭。再講，你對於自己唔接受嘅貨品，你可以唔買，咪幫襯黃店，你的一分一毫都可能幫到同路人，甚至幫手為前線的年輕人提供到就業機會，呢個比不斷抽秤要所有野要係黃更加重要，經濟圈要循序漸進，直至有日，我們可能會見到黃色上市公司，黃色地產商。這場黃色基建，任重而道遠。