買保險不如買保險股？

前陣子撰文講過保險與投資的分別，也講過年金，發現反應不錯，今次我又嘗試討論一個花式自殺題目，窮生以問號作結，是open question也是頭盔，呢個命題事實上可以用我之前提供嘅思路分析出結論，窮生講野、諗野同做野一樣，簡單幾招走天捱，學葉問話齋（其實係梁朝偉講的），詠春拳只得「三件頭」攤、膀、伏，咁又點？使得就可以。

保險公司點解咁賺錢？

呢個係一個複雜嘅問題，係做生意嘅角度，保險業同金融一樣，資金主導，冇咩機器，生產線等等綁手的問題，聽到邊度有錢聲，衝過去就可以。人有左錢自然就怕死，早前亞洲新興市場掘起，世界各地唔少大型保險公司紛紛搶佔市場，其中一人就是小小超的FWD，可見其眼光同野心。

講到保險，其實同開賭類似，都係一門數學，你入賭場可能嬴可能輸，但你唔會見過賭場輸錢，因此所有盤口都由精算師精心設計的數學模型，如果你為賭嬴而入去，長賭必輸。不過保險公司有少少唔同，就係佢同你對賭，好少人會想嬴保險公司。如果連個賭仔都唔想嬴，保險公司睇住數黎開盤口，收入當然穩定增長，成績唔好，都係同業競爭問題，個市場本身係友善的。

買保險不如買保險股？

大家對呢個題目點睇，視乎你用咩角度去買，如果你想要金錢回報，大家可以睇睇圖。友邦(1299)5年升高過一倍，平保（2318）升近兩倍，除左中人壽之外，熱門會投資的保險股成績也都不錯，雖然唔敢話隻隻都會跑嬴儲蓄保險計劃，但睇數字似乎買入保險股比儲蓄保險計劃看得簡單直接。

不過正如我之前係講年金果陣有講過，保險同投資理應分開考慮，因為保險是一個風險池，係all or nothing，而且發放保險金的時代，理應是投保人收入最不穩定的時候，所謂養兵千日用在一時，實非單純的投資回報概念。所以當有網友問我有關投保問題果陣我都解釋，我自己會傾向將投資同保險分開，投資有投資嘅方向同目的，就是年回報，包括資產增值同派息，有數得計，而且能供給我日常生活。而保險則是保障大家在意外發生時候的儲備金，是兩種完全不同用途的產品。當然，係唔係一定要買保險就因人而異，有人會選擇做一個家族基金代替保險，一家廿幾口每一戶人都供一份，等日後邊位有意外都有個保障，這才無疑是一個方法，也是個風險池，只是你並不是跟保險公司買而已。

人有了錢就買保險　我買保險股就變有錢了　

未來因為中美貿易戰關係，中國本身的生意，極有可能會流失一部份到新興市場，以往相對較貧窮的國家，將有可能因為工商業發展而起飛，創造出少數的富人和一大堆的中產。人有了錢就特別怕死，保險業在這個時候就有機會有爆發性增長。作為投資者要抓緊機遇，就要做足功課，看看個別保險股的業務性質，有哪些會在未來新興市場發長較好，例如友邦（01299）業務除了中港保險之外，亦包括越南、泰國、馬來西亞等新興市場，而平保（2318）更像是一隻金融股，主要是投資部份，也很受資金流向影響。所以再次經濟週期，我都會買平保，而如果是打算投資在保險業務發展，我個人還是認為友邦相關系數較大。

Why not both?

其實窮生在不同的文章都提過，了解不同工具的性質和用途很重要，了解左之後，你就可以揀自己岩用嘅工具做你想做嘅野。保險是保障意外，保險股可帶來意外收穫，兩者是沒有衝突的。未來世界普遍認為全球經濟會放緩，是我們的危，也可以是別人的機，讓有了錢的人令我們變有錢吧！

*文章只是窮生個人對自己投資組合一些睇法，並不構成投資的意見或建議。在作出任何投資決策前，您應考慮自己的財務狀況、投資目標及經驗、風險承受能力及理解相關產品的性質和風險的能力。有關個別投資產品的性質和風險資料，請參閱相關文件。您應尋求獨立專業顧問意見。