一件散水餅 兩堂職場課

人大左，總明白人生好多離離合合，散散聚聚。30歲，可能並未開始會經歷太多生離生別，所以面對最多的，應該是辭職。我在每一次Last Day都會講一次同一句說話，公司只係一個工作嘅地方，一班人咁岩係同一間公司做野，我同呢個office唔會有感情，我對回憶有感情，對某d共事嘅同事有感情。關係好嘅一個Whatsapp來相見，關係唔好嘅，放過人地放過自己，話唔定見少左，會冇咁討厭相方。講呢個題目事源近日有單野，網上流傳了幾張Whatsapp對話圖，有位地盤同事Last Day派散水餅，竟換來老闆一句：「乜係地盤危急時散水，係人所為？」

世上決沒有無緣無故的愛，也沒有無緣無故的恨。何況返工都係為生活，無乜問題都唔希望心生怨恨，所以係職場上，我比較少有討論嘅人，當然冇遇到真正的人渣，也是出於好運。同事離開，多多少少也是有點不滿才走，要人笑哂咁走，有點虛偽，做得太假也侮辱老闆智慧，我係老闆，我寧願你直接同我講你點解會走，未必一定想留你，而係給我一點參考，好等我日後有機會留住我想留嘅人。

一堂留給老闆

又要loop一次，而家失業率低，各行各業都搶人，請個正常人已經不易，我不貪心，請到個令日常工作運行順暢嘅人，我也已經會出力去留。今時唔同往日，打工仔上黎做一份工，唔係乞一份工，大家係互相欣賞先坐得到係office，今日同事要走，可能是另有高就，公司俾唔到佢想要嘅佢，此為最好的情況。作為老闆，應該學識祝福佢，希望日後大家仲有合作機會，話唔定日後佢會帶挈公司發展呢？

如果同事係裸辭，就好明顯係不爽，怨氣好大。人地都付出左成本（中間沒收入），老闆就更應體諒，虛心了解下到底發生乜野問題，因為通常有得一個，就有第二個，了解到當中問題，就能夠防止下一個人才流失。會不會是薪酬追不上？又或者是工作沒有滿足感？除左生意唔好係公司擔心嘅問題，唔夠人做野都直接影響公司生意，所以點解全球近年都積極發展新式嘅人力資源管理，著點發展員工個人潛能，而唔係機械式工作，有工作可以用機器代替，不能用機器代替的工作，就代表你需要人性化一點對待這種工作，以及做這種工作的人。好好吃下這件餅，最後一天，好好跟這位同事聊一聊吧！

一堂留給自己

雖說現在老闆同員工地位相對平等，但大家實際為這個崗位所投放的資源，以及所冒的風險都有所不同。轉工，係麻煩嘅，又要執過哂d文件，更新cv，部份更要更新portfolio。當決心辭職果刻問清自己，當日踏入公司門口，對自己作出嘅應承，希望得到嘅野，今天兌現到幾多？在同一個地方工作數年，就好像跟一個女朋友拍拖一樣，相處耐左一定發現到對方缺點，人係喜歡不停將對方缺點放大嘅生物。人從來都不理性，所以我們做每一個決定前都要提醒自己，這不是一時衝動的決定，然後走出第一步，就不要回頭，不要後悔。

我都要強調一次，我個人非常幸運，沒有遇到過人渣老細。當然，出黎工作十年，會有重用我的，也有不重用我的。人人工作風格都唔同，我唔係聖人，我唔會覺得每位老細都對我好好，唔重用我，令我浪費光陰係令人失望的，不過可以肯定，我跟每一個老細都學到野。人一世流流長打過幾份工少不免，其實搵到一個半個當你係千里馬嘅老細已經夠。今日你要離職，或多或少覺得公司虧欠左你，就move on吧，工死工還在，下個不一定更可愛。旺季大把人轉工，話唔定下一份工，只係你同某個你不認識的人交換糞便品嚐而已。當然，轉得工，極有可以係升左職，又或者加左薪，你心目中的薪酬價格又重新「起錨」，2－3年後，這個「錨」習慣了，工作又不滿了，又可能再因了解而分開。