Freelance定價攻略

由於近來工作比較忙，少左時間處理理財資訊，又因為個市升到呢個位，走又未得，買又太貴，控制到嘅部份唔多，呢個時間最好就係將心機放係其他收入上，畢竟我同大家講過好多次，我地唔係金融財俊，掛住睇市，荒廢本業係唔得嘅！所以今次想同大家講下其他收入象限，就係Freelance。

有睇過《戒窮》嘅讀書都知道，係Freelance係四大收入入邊係第2象限，係以專門技術換收入嘅賺錢方法。同打工唔同，Freelance係相對自由彈性，無論工作範疇、工作模式、同收入，你都可能係每一單job入面作出調整，你可能選擇做邊一單job，唔做邊一單job（如果你有job的話）。今次我主要想同大家探討嘅係定價問題。由於窮生本業係做設計，偶然也做教學。以下內容難免多數係用設計／教書黎做例如說明，亦主要係談及係有正職嘅情況之下接job而唔係全職Freelance，有關全職Freelance嘅唔好處我已經係《戒窮》交代過，有興趣可能係果度睇返。

Freelance定價應以什麼基準出發？

坊間Freelance工作嘅種類唔花百門，職場模式轉變，未來Freelance工作機會只會多唔會少，而大多數人做Freelance都係做返自己專業類別嘅工作，例如你係digitl marketing係會接返fb／ig廣告job，你係programmer你會寫網頁，寫apps等等。我問過好多人其實都有接Freelance嘅習慣，但係個個都同我講唔識開價，我唔有時真係唔知知地講真定講假，但係的確有好多有專業技能嘅人都因為太專注係做野方面，反面project management方面比較唔重要的，而定價就係project management最開始果陣最重要嘅一環。

Freelance同生意有好決定性嘅分別，生意係系統賺錢，freelance係個人技術賺錢。所以生意上，接job一定係計系統嘅計作成本加溢價做基準，呢點大家都知，睇住成本做人，而freelance成本係乜？就係時間！所以一般有關定價基準，我會base on日薪，例如一個job，需要用幾多時間去做，就以自己份正職嘅人工除返日數。唔需要理會日間工作時間，因為你放工後嘅時間當然比較珍貴，係有「溢價」的，全職Freelance的話應該參考正職人工薪酬，乘加一個「溢價」，例如30％的溢價，得出一個基數，呢個係你最低最低嘅開價基準，低過呢個數，代表打工份糧都高過佢，唔值得做，除非單野有非金錢回報，例如係知名Project ，做左會學到平時學唔到嘅技術，令你出左名等等。呢類factor請自己衡量價值，因為呢d因素係好難量化，有d job直頭有人唔收錢做，所以頂爛市到把握機會，其實係一線之差，亦係好多人渣老細呃人做奴工嘅常用技巧之一，點分辨當中真偽，就係所謂工作經驗，呢度唔詳解了。

Factor01 工作密度

得出基數之後，仲有咩factor會影響定價？其中一樣就係工作密度。乜野係工作密度？就係你單野趕唔趕。趕，即係要chur ，chur一定係貴，因為十日完成嘅野你要求五日完成，當中唔只係保證完成，仲要保證冇出錯，保證有一定質量。所以如果你問我加得最多係咩factor ，我會揀係工作密度。因為做過生意你會明白，有時老闆唔一定要做到d野最fine，因為個客都唔係俾一個好fine嘅價錢，當然你做到係最好！但最重要就係，你唔好搞到件事炒左，準時，有交帶，冇出錯就最緊要。而如果係老闆令到件事咁趕，要搵到可能令你安心託付嘅freelancer，呢d錢係唔慳得，錦上添花好多時都唔及雪中送炭。

具體操作我通常會照計返自己正常工作日數，唔需要理會佢個期，就算得5日做，而你判斷到其實正常要10日，你都計返10日錢，另加少少溢價。多少就視乎自己有幾鍾意個job，個job有趣，個溢價咪可能少d，厭惡性工作咪多d，咁簡單大家應該唔需要我多解釋。

Factor02 工作質量

講完量，當然係講質。呢個factor對唔同人黎講判斷都唔同，所以我只可能提供一個思路俾大家去就自己情況作出判斷。所謂工作質量，係指單job係咩水平嘅job，以廣告黎做例子，佢到底係國際大品牌靚廣告，定係宣傳易分類廣告先？當然好廢咁講，咁大廣告做d野難d，當然收貴d啦！冇錯！不過就算大家都係做簡單野，只係一個出youtube，一個出電視，大d果個都應該收貴d，應該道理好簡單，因為廣告公司做完條廣告，都會就返條片係唔同平台播放，收返唔同額外金額。你作為freelance當然唔關你事，所以當你接job果陣，呢樣野就要考慮在內。

除此之外，工作質量仲講緊單job到底有咩金錢以外可能帶來嘅好處，就例如雖然難度高，但係做完一次，下次可能有d部份可以重用。又可能係個job可能俾機會你嘗試你一直冇機會試嘅工作，可能令你升價十倍，咁都係值得考慮嘅因素。

Factor03 做生不如做熟

呢點唔係講緊對熟客一定收平d，而係因此你同佢合作得多，你了解佢工作習慣，可能透過了解同磨合，作出更精準嘅定價。我成日都話，冇最好嘅員工，最好嘅老細，只有合適嘅員工同合適嘅老細。俾完一單job你做，有得第二單，係肯定，亦係緣份。呢d野仲要唔一定係老細主導。我都有唔少例子就係，做完一單，以後都甚少再接果位老細嘅job，問親我我都係話唔得閒撞左期，又次次拒絕完佢次次都仲會問，你就知佢真係搵唔到人頂得順佢啦！

熟點都好過生，因此人人做野方法唔同，我唔想評論個別人士咁做野係好定唔好，我自己都唔係完美啦係咪？但係有d人做野同你唔夾就係唔夾，面對呢d人，會令你做野好辛苦，辛苦自己成本上升，咁下次逢係呢個人搵你，你都識自動加價，因此做過freelance都知，傾果陣一定係乜野都話好簡單好少，到做一定又係另一番景象，所以當中呢d風險，做生客一定預左要食，做熟就一定相對穩定，所以對於合作舒服，又穩定嘅客，我一定收得順好多。又由於我唔係主職freelancer，我唔係手停口停，冇必要狗屎垃圾job都接，所以對生客，我一定係進取開價，做得到係緣份，做唔到咪休息下囉！

Factor04 技術含量

如我一開始都有提到，Freelance定價的基準是「時間」。咁技術呢？係一單Job入面佢係咩角色？答案係「競爭優勢」。當然，做技術含量高的工作，當然都會有溢價，但對我來說，重要的不是溢價，除非技術含量高到市場只有你／只有極極極少數人識做，咁價係任你開的。否則，技術應該作為吸引客人搵你開工嘅賣點，會比較有利。不過大家要分清楚，技術含量高，同工作時間冇直接關係，有d野難，但係好快做得完，例如部分顧問工作，教學工作，都係不花很多時間而技術要求高。如果你單純以技術開價，令工作減少。倒不如用時間計更能把自己的效能推到最高，吸引有賺錢效率的工作主動找你比較好。

Factor05 其他成本

雖然我係之前講到，Freelance同生意唔同，但係其實工作性質係一樣。有d freelance例如係做marketing／producer工作，佢主要係做operation而唔係真係生成一個產品，佢主要係要睇住個進步，確保件事係可行而進展順利，即係佢係分波俾人果個。當中既考慮部份就愈來愈向生意靠攏。一單野如果由你分波，當中必然涉及好多成本，人力、器材、技術都係。其中，人一多就一定貴，你作為稱職嘅負責人必然要計好成本，做左野當然係要mark up，因此係過程當中你用到人脈／解難能力，本來要用2個人做5日的工作，你只要用1人做7日就可以，當中就係你嘅利潤，當然，市面上好多呃飯食嘅「分波人」，自己對工序唔熟悉，只係不停以捽下線搾取利潤的大有人在，呢點要注意一下。

Factor06 個人因素

講到最後，呢點其實係最唔關份job事，但係又最重要。因為如果你下個月租都冇錢交，乜野狗屎垃圾job你都要做。平又點？chur又點？你冇錢開飯，就唔好同我講單job厭惡性。所以我點解要分流咁多理財同定價嘅技巧？我同你同一行，你地成行人都咁唔掂，你地影響到我呀知唔知呀？

相反，如果大家經濟上冇問題，只係希望可能係工餘時間可能接觸到自己可能發揮，而又賺到額外收入嘅工作，咁做出黎嘅野，賺得到嘅錢都會有性價比，有質素。各位職人，唔好以計算為恥，你嘅收穫每一分一毫都係合理，而且有理據可尋，唔係一句為夢想就可以出賣時間心機的。