令人戰慄的退休童話

話說月前有中年網友pm窮生，同我講我可以多寫一下有關退休嘅話題，因為自己年過五十，開始擔心日後沒有工作之後，生活如何是好。我當時笑說因為我嘅讀者大多都係90後，寫太多退休話題對佢地黎講會唔會太遠？本身都冇打算寫，但係我睇到呢幅相。

我唔係打算講政治（因為我唔識），我只係由呢件事同之前政府收緊長者綜援作出種種沙盤推演，話俾大家聽，如果80/90後今日唔為自己退休生活作出財務上的打算，到底會發生咩事。我由特首出黎補飛到而家，都睇左唔少評論同個案，坊間好多人士同團體將重點放左係「向窮人開刀」、「政府想慳錢」，窮生認為係成件事錯左重點。事實上行政長官林鄭月娥已經多次回應公眾，話此舉冇慳錢嘅考慮，畢竟而家都回返水俾大家，所以我相信呢句說話，因為更恐怖嘅野已經發生。就係有關人口政策嘅變化，政府對付人口老化嘅辦法，似乎已經定左方針，就係推返佢地去職場，但係問題就黎，點解要用收緊長者綜援，而唔係正正經經推遲法定退休年齡？

幾時退休未必由你話事

原來，香港根本沒有法定退休年齡，大家對所謂65要退休嘅印象都係因為大公司工作嘅合約都有定明退休年齡,所以大家就覺得65歲就係「法定」退休年齡。咁問題就黎，係現實上呢班60-65歲嘅人，係咪可以安然做到佢地覺得夠皮為止呢？世事往往都未能盡如人意。如果你係大公司／政府員工，合約已經訂明左你係幾時退休，你應該一早知道，所以係你差唔多夠歲數，而你又「未搵夠」，你應該要及早計劃你係離開現有工作之後嘅出路。反之，如果你係中小企做，咁你更加要時時刻刻都保持警覺性，因為大家都知道，60歲失業（搵夠果啲先叫退休，未果啲我一律稱呼做失業）的話，你係人力市場上搵工係非常困難。勞工處的中高齡就業計劃九千多則招聘通告中，有近四成都是清潔、保安、零售及飲食，被界定為低薪行業的工作。呢個要多謝最低工資，因為有左最低工資，就有左個市價嘅「錨」，後生仔可以做更好嘅工作，一路以年齡同能力排落黎，揀剩最後的，就係人又老，身體已經跟唔上嘅長者。即係話如果你60歲之前未砌好自己嘅被動收入組合的話，就會係做清潔工、保安員、外賣、茶餐廳伙計之類工作，先唔講人工好唔好pay，你六十幾歲仲頂得順，都幾好野。

砍掉重練的再就職

窮生早前都有睇特首同局長嘅記者會直播，係會內局長好清楚解釋呢個改動唔係為左慳錢，而係配合而家人口變化作出嘅改動。喂！即係講左俾大家聽，未來政府解決人口老化嘅方法，就係叫你班老人家唔好咁快要政府養，做多十年野先啦！做都唔係問題喎，而家佢地分分鐘係要做啲青年至中年都不屑去做嘅工。其實人口老化係全世界都有嘅問題，所以我係支持推遲個退休年齡，但係如果勞工法例同合約慣例都跟唔到，就會出現而家呢個情況，就係你地要「退左先」，之後再重新搵過工，對青年人黎講一定有好處，因為個位空返出黎嘛。但係老果個就慘了，砍掉重練。

但係又咁講，而家65歲果批「中年人」，出生係60年代，點解都唔早早儲定錢，準備退休理財計劃呢？窮生識唔少而家60-70歲嘅長輩，都係粗人出身，都已經有幾層樓收租，生活無憂。今時今日形勢比當年更加嚴峻，如果今日30-40歲嘅80後唔早早為退休做定理財計劃，連月供下股票，做一啲簡單嘅資產配置如定期買入收息股/直債都懶，30歲自住，40歲收租等等時間表都未定。他日又會係邊度見到大家呢？

*筆者母親於52歲在外資銀行被裁之後，做過文員、保安、售貨員。最後在2009年決定退休，同年，窮生大學畢業投身職場，當時媽媽積蓄只有1萬元左右。我細細個已經睇住呢件事係我身旁發生，真係唔該大家早啲準備定，唔好要個仔頂到咁行，好辛苦的T_T。