共居的演化，向日本網吧取經

講到日本人瞓網吧，我諗最少都有廿年，我成日都話市場係你估計唔到，一定係你就個市場，冇理由要個市場就你（除非你係apple），日本網吧就係好例子。你初頭開間網吧，係俾人上網打下機，睇下漫畫放鬆下。同cafe唔同，日本呢類網吧比較著重私隱，所以分左一格格，你唔會見到人地做緊乜野，呢d網吧你好少會幾大班人一齊去，多數一個起兩個止。但你呢個只係經營者嘅一廂情願，你提供咁嘅服務，就有人會自由聯想適合自己嘅用法，所謂網吧難民就係咁誕生出黎。

一開始是無可奈何的消費者

所謂網吧難民，就係冇自己屋企，靠租住係網吧一小格入面生存嘅一群。佢地大部份其實都有工做，有部份分分鐘仲係大企業嘅正社員，有人係因為工作太忙，有人因為家庭問題，當然好多都係窮嘅問題啦(DLKH)！網吧嘅吸引力係邊？第一當然係因為價錢平，二來服務其實都相當齊全，有野食有野飲，又有沖涼有得上網，一般基本生活需要都齊，唯一要克服的，就係要在2.5米X1.2米左右的空間生活。起初，呢類網吧就吸引左一班無可奈何嘅消費者，所以網吧清一色都帶點烏煙瘴氣，也帶有一點點的治安問題，選擇入住係冇辦法之中嘅辦法。

市場演化造就網吧第二波革命

日本人有樣野好，就係貼心，而且唔只係對有錢人貼心，而係對所以”お客様“都貼心。而家唔講其他地區，東京都內嘅網吧都開到成行成市，而且由於競爭，演化出好多高質選擇。早前我就睇過youtuber Ryu & Yuma夫婦試住。二百零蚊，環境新淨，有機打有漫畫，仲任飲！令我大開眼界。以前係冇選擇，而家係自願放棄租屋而轉投網吧，呢種人睇怕仲會有上升趨勢！

早前日本《NEWS ZERO》就訪問左個月入50萬日圓嘅上班族，佢直言「雖然想找其他屋，不過還要保證人，跟入住的保證金等等，之後還要繳房租感覺就很蠢，還要繳水電瓦斯，考慮這些以後，覺得住網吧比較好，比起長時間通勤，還是有多餘的時間比較快樂」。可見，日本的網吧文化，由最初的無可奈何，演化到現在的「有吸引力」。

香港侮辱了共居文化

無論係劏房定Share house，係我眼中只要係共用廚廁，就可以算係共居。香港的共居文化從來都打住「鬼叫你窮」的精神，完全係冇得揀之下嘅選擇。而且因為政府本身都怕執法太嚴會取締好多呢d劏房，令到好多人冇地方住，所以對好多違法，以及好多唔安全同衛生環境惡劣的劏房視而不見，難怪係好多香港人眼中，對劏房都有種唔好嘅刻板印象。

另一方面，係我以前一篇舊文《劏房萬惡，共居才是出路？基層住屋的需求與供應》已經有提到香港有社企都好推崇共居，呢間社企仲打住居住正義嘅牌頭，對劏房口誅筆伐。我睇返唔少新聞同片段，其實佢口中果d共居房間同劏房之間，只係多左個廳嘅分別，咁係咪真係幫到窮人呢？自己FF所有租戶都好融洽，晚晚愛回家咁幾家人一人煮少少野一齊食飯呢？窮人就好實際，聽完之後個個都寧願住劏房，市場係用腳同錢投票的。香港搞扶貧，就係習慣去FF窮人生活係點，我地要幫佢「改善」生活，我話俾你聽你要咁生活啦！咁係侮辱左民間智慧，都侮辱左流行於歐洲嘅共居文化。

共得招積住得舒適

我唔能夠否定住大啲真係開心啲，但係細，係咪一定唔人道呢？我睇都未必。我有幾位朋友都係專業人士，佢地月入6-7萬左右，單身貴族，又係派對動物！明明都就黎40，我都唔知佢地啲精力係邊度黎，成日放工都落Club玩，好少係屋企。我想講嘅係，佢地不約而同都係住服務式住宅，都係細到喊，月租仲鬼咁貴，但佢地enjoy，點解呀？因為方便，行返公司再落埋Club，40歲人唔洗依賴交通工具，多出黎嘅時間可以做好多自己鍾意嘅野，其中有位朋友，連車都係租，車位都慳返。

所以其實如果服務有水準，劏房唔一定係差。就算好似日本網吧咁，2.5米X1.2米，一張好嘅大班椅，有電腦有機打，有野飲又有漫畫，咁樣係市場上應該都不乏競爭力。其實好多新演化，都係人首先要放棄刻板印象，為客人諗多一步，大膽創新先可以出現。不如大家都放下偏見諗諗，有乜野factor係可以吸引你入住？