劉鳴煒與姜濤—打造香港第一個 「寵物系」CEO

一個多野講，冇人想聽。一個無野講，俾人係咁撩。中間，似乎隱藏好多學問。

大劉之子劉鳴煒最近見論再度惹火，自2015年叫年輕人「睇少啲戲」，「去少啲日本」就有機會買到樓，俾人講足3年。之後上個星期又係港台分享自己小時候嘅「班財心得」，10歲生日收10萬蚊利是，自己都＂竟然＂冇駛左佢，仲日日數住果100張1000蚊紙，珍而重之，引起網民直斥佢離地，炫富等等。當大家以前佢已經冇哂貨果陣，佢幾日後又係第三屆「香港青年服務領袖獎」獎勵計劃評選日再發功大談自己見工面試策略！佢提到如果得兩分鐘介紹自己嘅話，最有利嘅策略係「keep it simple」，講出自己嘅特質！仲話要打動人嘅關鍵唔係點表達，而係表達啲咩。

其實點表達都好重要

其實你問窮生，我就覺得其實佢除左講10皮野利是果下真係離哂地之外，其他言論都唔係真係咁有爭議性呢，甚至其實都有其道理係當中。不過點解次次佢講親野都出事呢？呢個就真係唔係表達啲咩嘅問題，而係點表達嘅問題了！今次篇文如大家所見係兩個男人名，放心唔係BL，而係真心希望劉生可以做得更好，向D後輩取下經。講下姜濤，可能有D人唔知佢係邊個，尤其係我嘅讀者大多都係投資、理財愛好者，好可能甚少接觸娛樂資訊，我就簡單介紹一下。

姜濤係ViuTV節目《全民造星》入面最年輕嘅一位參賽者，亦一定係《全民造星》入面最受歡迎，最紅嘅一個。佢當然靚仔，但你問我佢係唔係唱歌好好聽，跳舞好叻？都一定唔係，佢紅，係因為形象鮮明，係因為故事。佢冇以前天王巨星嘅君臨天下之勢，令人喘不過氣嘅過人魅力，反而佢係因為怕怕醜醜，不善辭令又呆呆地嘅性格，成功俘虜一班女士嘅心。有人話姜濤係暖男，呢個似乎不太準確，姜濤呢種就好似2007年Johnny事務所旗下團體Hey! Say! JUMP果種「寵物系男生」。什麼是「寵物系男生」？就係果種天然呆，一方好需要關愛，又可需要保護，另一方面又令人好想欺負下佢嘅男仔，姜濤完全咁呈現左當中嘅特質，讓人愛不愛不釋手。

說到年期姜濤被網民(女)捧成男神，其實大家都可能記得劉鳴煒都「男神」過。係2015年劉鳴煒上左港台節目-香港乜乜乜上面，同游學修1on1。成功得到在場大部份女性投下神聖一票，由於其中1位女參加者大讚劉鳴煒「樣子跟整個package都是他好一些。」所以劉鳴煒先有package劉的稱號，當年，佢對眼電嬴左游學修。

劉鳴煒有「寵物系」特質

說到劉鳴煒要向姜濤取經，就係因為其實劉鳴煒也有做「寵物系」嘅條件，官仔骨骨，五觀端正。父親大人出名係大開大合，做生意大有獅子撲兔之勢，可見由細到大。劉鳴煒都是一隻「小白兔」。出到黎社會，因為要做生意同人deal，所以強裝堅強，不難理解。就好似姜濤年少時係200磅肥仔，就算今日已經變成男神，都難掩以前柔弱，怕受傷害嘅本性。有住同樣難以啟齒嘅「寵物系」性格，又既然做左咁多年「小白兔」，點解唔可以勇敢表現出來，俾姐姐抱抱？

當劉鳴煒現為香港華人置業董事會主席又同時係青年事務委員會主席，講搵錢能力，華置當然唔需要懷疑，但邊個先係劉鳴煒自己嘅事業，自己嘅世界，我相信佢好清楚。做青年事務，要了解青年人嘅困難，道理從來唔難明，要點先儲到錢，係google都可以搵到方法(例如搜尋:窮家有道-窮一生)，但係如果你太離地，唔理解點解青年人有困難，哪怕你幾口若懸河，幾多大道理，都唔及坐係記者面前，呆呆滯滯嘅姜濤，你都後生過架嘛，係咪？

為劉鳴煒打造香港第一位「寵物系」ceo，大家都應該包容一點，唔好只係睇佢係大劉個仔（雖然連google都係咁介紹佢）。佢都有努力付出過，多d鼓勵，用任何方式都可以，因為學佢話齋，要打動人嘅關鍵唔係點表達，而係表達啲咩。當有一日劉鳴煒再係公開場面講發表言論，而被男網民出黎大罵佢離地果陣，會有女網友出黎講:「其實嗰班毒L係咪好妒忌啲靚仔所以係咁批鬥人哋呀？放心啦…人哋有嘅嘢你哋呢一世都唔會有架！唔使妒忌啦！！！」果陣，再唔會有野難到劉鳴煒。