阿婆才最體現「真‧共享經濟」概念

共享經濟（Sharing economy）近十年喺坊間大行其道，受到追捧。好多Startup都食住呢個概念上市集資，一夜暴富。當中有啲公司就算大家幾冇留意財經新聞都會熟悉，例如Uber、Airbnb。共享經濟本意，在於人們可以將所擁有嘅資源／技能有償租借俾其他人，令閒置資源／技能獲得更有效嘅利用，從而使雙方效率變得更高。Uber有效地釋放了閒置汽車嘅使用率，Airbnb則意圖釋放房間。先不管有部分國家還未能令其合法化都好，係經濟學上，佢地的確有效做到生產力釋放，帶來實際嘅經濟收益。

我今日會講呢個題目，源於我睇左上星期嘅《星期日檔案》，講拾荒者(其實主要係講執紙皮婆婆)。執紙皮婆婆果D背後嘅人生五味我就唔係度多講，反正就係人人都有自己嘅故事，點解要做呢份工作，個個都有佢嘅原因。但係我反而對呢個”職業”，甚至所有人點睇呢個職業有啲想法同大家分享，我認為佢地比而家香港好多新經濟產業更做到共享經濟嘅效果，最少比所謂的共享單車黎得正宗好多，對社會更有貢獻。

執紙皮搵到食

片中主要走訪2位婆婆，一位明顯係樂在其中，覺得有錢搵之餘又環保，所以就算一日搵得一百幾十蚊，都日日去執。佢為左回收嘅品質，仲堅持唔加水呃秤，可見其使命感。另一位真係搵食嘅，所以做嘅量大好多，成條街佢執哂，一日可以搵到幾百蚊，人工絕對拍得住一份Full Time。人地覺得佢污糟，佢一啲都唔介意呢啲目光，事實上，呢種咁良好嘅態度，絕對係應該表揚而唔係睇唔起。

其實社會一直覺得佢地好可憐，覺得執紙皮好卑微，一直都忽略左佢地嘅貢獻。係上年九月，因為內地國策問題，廢紙回收商決定停收廢紙7日。冇市冇價冇人收，婆婆們當然唔會執紙皮，大家都估唔到嘅係，去到第2日，香港已經廢紙圍城，所有商舖林立嘅街道都堆滿紙皮箱，人同車都難以通過，最後迫到政府都要出手調停！你就可見，平時因為有左呢啲婆婆，我地產生左幾多GDP，又因為有佢地，政府洗少幾多錢去請外判清潔工，慳左幾多納稅人嘅錢？冇人做呢份工，對香港黎講係幾大影響。

沒有政策規管及教育

回收業作為一個同環境有關嘅產業，係日本同美國都係大生意，得到政府合作同幫助。因為佢地可以賺錢之餘，仲幫助到社會改善市容，對社會係直接地產生貢獻同利潤。但香港其中一個問題就係政策唔支持，唔推廣，唔教育。片中有一段係講婆婆係街上做垃圾分類，有居民不滿影響衛生，又阻街。其實呢d野，正正就係要教育。因為個婆婆唔係大學生，佢唔會識點做，佢而家識做到嘅野，係100%由一條渾然天成嘅產業鏈教佢，總之你執到有用嘅垃圾就有人用錢買，佢咪做囉！影響到你咩？佢唔識處理，你唔俾佢做，又會變成廢紙圍城。咁點？就係要由政府同業界合作定指引，劃d地方出黎俾婆婆可以處理回收。

我會講呢個議題，係因為我覺得呢行好有趣，因為回收商都坦言，冇左婆婆，呢行根本冇得做，因為佢地冇可能請人去18區執紙皮。而現實有左婆婆們，佢地可以好方便地，直接同回收商交易，而回收商同婆婆又可以完全達成到共識。係經濟學角度，呢個真係一個勁過uber eat嘅共享經濟model！完全係釋放左長者嘅勞動力！邊度有紙皮？有幾多？點行最快收到最多？你冇可能熟得過婆婆。以前我地經常係以可憐目光睇件事，覺得婆婆咁老仲要推車執紙皮好慘。我唔排除有好多都真係好慘，呢個要靠政府安全網。但其實中間有更多長者，係因為表現到自己仲做到野，當中嘅成就感，可能我地做後生嘅都未必會明。

總之，既然市場生成左一班婆婆，又有個咁好嘅共享經濟產業鏈，點解唔可以做多一步幫下件事呢？我就覺得，包裝下，呢個分分鐘係下一隻獨角獸喇（笑）！