老闆縮數之謎-加人工的魔鬼演算法！

2017年我地經歷左一年嘅大牛市，好多平時唔炒股票嘅人都紛紛入市，我亦收到好多初入股海嘅讀者pm，次次答親都不免有多少無奈。隨住今年2月開始大市兩度見頂，投資者一係就轉投美股，一係暫時退守。股市勢弱，我同好多人一樣，唔係金融從業員，股市唔好景，工仲係要返嘅，反正睇得窮生，都唔係短線獲利人士。所以今日我地講返自己份工，不過都係要計數。

我係起初講解投資概念嘅文章提過有關複利的問題，指其實一個長遠投資，我地目標係透過年月累積嘅利潤再投資，達到複利效應。其實呢個概念放係份工，甚至係加人工一樣係work的。我可能會比較少啲，窮太幾乎幾日就收到一次讀者向佢pm問有關工作同待遇嘅問題，有關職涯嘅野，呢篇文就唔係佢面前班門弄斧了。我反而用返我嘅專長——計數黎做少少分析，當然職涯上好多野唔可以單純同數字同錢去衡量，所以呢篇文，大家就以輕鬆心情對待，又或者攞去俾老闆睇笑下都可以，如果你夠膽的話（笑）。

早加早享受，遲加多幾舊？

呢個圖就係我嘗試模擬兩個人由22歲大學畢業到65歲退休嘅收入表，入面未計通脹，單純睇加人工嘅幅度同密度去比較。大家可以見到左方（下稱Ａ）係一直以一個冇乜高低起伏嘅職涯上行，見到都覺得悶。右方（下稱Ｂ）可能比較似你同我，都係加下停下，到到黃金期可能升下職跳下槽又加多D。大家起步一樣都係15K，收尾都係差不多人工。其實但係大家有冇留意到A同B最後累積收入可以相差180萬，即一生人的差不多10%收入(仲未計投資回報及通脹)。

好多公司其實都係咁，未必會年年調整員工薪酬，博你頭1-2年唔敢出聲，去到第3年你出聲，佢拖多半年，加多少少俾你當補數，例子B就係好好嘅示範。仲會同你講，加果少少冇乜用啦，到你升職加果口價，先係真銀呀嘛！咁你就信左嘅話，少年你真係太年輕了！其實對老細而言，老奉年年加少少係好唔情願，因為人數多，人人加少少，一年多出嘅開支就大，而且加左人工，工作內容冇變，好多老細都覺得冇著數。大佬！升你職，加你20%，起碼我可以駛死你呀嘛！

財富靠複利，人工都一樣！

其實心水清嘅朋友都會知道，加人工係用%去計的，而人工又係逐年檢討，今年加左嘅數，就會疊加到下年嘅基數，一年疊一年，人工愈來愈高，你果個3%真正帶黎嘅利潤就愈多，我記得有一年公司加我3%，我走入去同老細呻，佢竟然同我講：「唉也！‘你估得你係咁咩，我都係加3%咋！大家共同詮退囉！」你知唔知我當時幾想一巴車落佢度，你果3%同我果3%，絕對係兩回事。同一道理唔單單係短視地睇人工問題，當你想轉工果陣，如果你2-3年人工都冇變，絕對影響下一份工叫價同印象，以為你做咩事停左2-3年，係唔係表現唔好。

人工如股價，花紅如派息

正如我係<<戒窮>>的投資篇講過，就算係收息股，股價都不能無表現。有好多中小企，由於資金有限，好多時唔可以加太多人工，以免面對困境而週轉不靈。有D好嘅中小企老細，面對個別員工有表現，立左大功，好多時年尾會出多份特別bonus，情況就好似股票派特別息一樣，大家開心下。但係如果老細長年都用呢個方法獎勵你，而人工長年唔加，長遠黎講對你都係冇益，因為始終bonus都係同人工掛勾，你15K一個月，我出多30K bonus俾你已經係15個月糧，你當然開心。但如果我人工係60K，你出30K俾我，我絕對係會請你食蟹，DLKH！