後生仔唔掂？一日最衰都係GOOGLE！

上一篇講到同HR對談，其實今篇係續篇。係由職場角度去解釋後生仔同上一代嘅分別，到底後生仔點解會變成咁，佢地又有咩長短處？呢篇文我會嘗試綜合左HR熊嘅經驗，加埋我實際操作嘅理解去嘗試整理一個結論出黎。由於講後生仔不是，我都遇左俾人鬧架喇！不過每代人都有佢掂同唔掂嘅地方，咪有則改之，無則加勉囉。所以如果覺得當中有盲點，都歡迎指正，增潤下窮生嘅知識。

世代之爭是必然存在

講緊而家大氣候係後生仔VS老屎忽，大家都唔會唔同意，兩代人有一定程度上嘅對立，係職場大家可能唔敢直接講出口，但係只要大家稍為上下facebook/IG，你就會見到兩代互相指罵嘅情況係嚴重，「廢老」、「廢青」你一言我一語，其實都幾浪費時間。原因係大家根本冇認真了解對方係點樣煉成，大家都活係大家嘅年代，對自己以外嘅事情無心理會。後生仔對大人嘅標籤頗為反感，一聽到80後、90後已經反眼，但其實後生仔何嘗唔係用「老野」、「上一代」黎標籤對方呢？窮生認識很多好潮嘅老人家，都認識好老土嘅後生仔，但呢啲都係少數。事實上人嘅價值觀、處事方式，好大程度上都受時代、環境影響，因為每個年代都會出現改變世界嘅科技/新事物，由報紙到電話、收音機，再到電視機、電腦、互聯網，再到智能手機，到而家講緊AI。你點能夠話一同出生於「智能手機年代」嘅00後冇一種同共價值呢？所以標籤問題唔大，唔了解標籤背後原因先係大問題，上一代如是，後生仔如是。

青春不是無敵

後生仔同老屎忽既然擁有完全唔同嘅價值觀，自然係兩種唔同嘅生物。我成日聽到而家好多企業好Proud of公司平均年齡廿幾歲，好年輕之類的。其實後生同「掂」係咪有等號？係呢度，我必須要先為老屎忽講一講好說話，其實係公司入面，如果只有一種思考角度嘅人，係相當危險而愈大嘅公司，風險亦愈高。係管理嘅角度出發，我地通常唔需要兩個同一種skill set嘅人，除非技術性嘅工作吧！

以前一個generation講緊10年，而家一個generation最多3年。個世界行快左，班老鬼難跟左，有後生仔係度，的確係有著數。問題係個世界行得快左，你呢個「後生仔」嘅保鮮期都短左，姐係話以前出黎撈10年你先係老屎忽，而家你最多3年已經變「老」。咁所謂我後生你幾年，係職場算唔算係一個賣點呢？還是係對新知識嘅好奇心先係歷久不衰呢？打算以青春無敵做賣點嘅FG不妨諗諗。

一日最衰都係Google

另外我聽得最多老野話後生仔嘅就係「自我中心」，自己嘅野係最重要，其實人/公司嘅野都唔當一回事，少少唔滿意就走人。佢地多數會歸咎上一代太寵佢地，自小物質充裕，所以十幾年前我地有「草莓族」，近年我地嘅年青人發展到「中二病」。作為一個勉強仲稱得上年青嘅年青人，你問我後生仔係咪多多少少都有啲中二病，我係同意的確有的，甚至我都有多少呢種問題。問題係你要知道呢啲問題點黎，你先可以提醒自己，甚至作為HR提供專業意見，幫公司員工做training，而唔再係搞隊波、打下war game就叫team building。呢個發展，對坐係冷氣房嘅HR manager當然係跟上，甚至好多分析年青人問題嘅學者、社工都只係係「線下」解釋呢啲行為變化，佢地唔了解，呢代年青人由牙牙學語開始，已經係網絡時代，同澳門線上賭場一樣，一開始已經上線啦！

讀到google點樣漂亮地擊敗yahoo，必然係講google對搜尋器(search engine)發展嘅突破，以前yahoo就係你打你想要嘅野入去，佢就幫你搵最似你要搵嘅野出黎。google成功收集大數據，主動地分析你有可能想睇嘅野去「推介」俾你睇。呢算演算化嘅文化亦係facebook可以稱霸社交平台板塊嘅原因，同時亦令中二病世界性地擴散。google同facebook嘅「貼心」真係令大家方便左好多，以前我地要去好多唔同地方，問好多唔同嘅人先可以得到嘅資訊，而家佢地一個地方可以滿足哂你，大家好似係多左野睇，但其實慢慢會將你嘅視野一步步收窄。

上一代人有好多唔同雜誌放哂係度，佢地要出盡發寶引你買黎睇睇。到我果代有左搜尋器，我地就習慣左主動搵自己鍾意嘅野睇。再去到呢代，係你上facebook、instagram、youtube，等佢比野你睇。變左你只會接收到佢地想你睇嘅資訊，而呢d資訊係根據你喜好同習慣提供的，你唔喜歡嘅東西，唔會出現係頁面上面，慢慢，你只會睇到自己鍾意嘅野，甚至向愈來愈小眾同極端嘅方向發展。係長期有「貼心」又免費嘅服務底下，你點可能接受得到當你返學返工，有人不停向你發出唔岩你心水嘅資訊呢？

instagram + youtube = 全世界

眾所週知instagram係facebook嘅，而youtube就係google，佢地兩分天下控制左後生仔嘅世界。有一次我返母校探老師，我例牌都會問下而家佢啲學生睇開乜野，玩開乜野。近年驚訝地發現，所有學生都係instagram/snapchat，睇就睇youtube，而睇嘅youtuber出奇地非常一致，都係果幾個。

雖然窮生同同學仔們都出youtube，但其實我地各自要係youtube搵到對方睇緊嘅野，都有一定難度。因為係演算化運作之下，我地所有喜好同習慣都被google掌握左，當你接收資訊平台單一，根本就唔會出現其他年齡層鍾意嘅野係你頁面上。所以你完全唔識佢地睇緊嘅youtuber，反之亦言。佢地會驚訝點解係佢世界咁紅嘅人物你會唔識，而當然因為由於佢地由細到大都係youtube長大，除左佢自己鍾意嘅野之外，其他野就會愈來愈唔了解了。

HR需要重新學習

我上一篇有講過HR係管理公司「活資產」，作為人力專家應該對「人」有好一點嘅了解先得。而係大數據面前，其實好多人類行為同習慣都赤裸裸地係網上任睇。我成篇文雖然講到google之類嘅科技公司係萬惡，但係我唔係果啲叫人用返56K上網嘅學究。工具係冇正邪之分，只有人心才有。如果立心要做好呢份專業，其實而家正正係有最多Tools，最多資源可以俾你令工作做得更好，其實唔論你係HR定係乜野Office職業，如果你仲停留緊滿足自己係科技白痴，駁部projector，開個power point都要call IT佬，會唔會就係被淘汰嘅先兆？