玩命談HR，HR到底有咩咁巴閉?

ViuTV一連兩集，<<又要威又要戴頭盔>>-HR篇已經完滿結束。我因為某d原因，當然兩集都有支持啦！其實我對HR行業嘅了解，都自問比一般人多，畢竟窮太本身已經係個專業HR。而我地平時都好多會傾關於工作嘅話題。我明白好多人對HR呢一行本身係冇乜好感，我自己對呢一個行業本身係冇反感嘅，但坦白講，我對好多係香港做HR嘅人係嗤之以鼻。呢篇所謂同HR對談，講嘅就係窮生同HR熊小姐就HR呢個行業、年青人/老屎忽職場問題嘅一D節錄同結論。其實我地討論過嘅野如果要寫哂出黎都真係唔得了，多到可以寫本書，所以今次主要係拋磚引玉，引發大家討論為主，希望大家對HR呢個大眾公敵都多D了解。

香港HR只係一個普通文職位

講起呢一點，我係幾欣賞窮太。因為佢正正就係唔係呢種諗法，佢由HR本學畢業，一直都係專注HR工作，對呢個行業真正需要去了解、掌握嘅範疇都會主動會接觸。但係好可惜嘅係，香港大部分公司同人，都視呢個行業與一般文職無異，好多HR根本唔係本科出身，而好多公司自己都認為，呢D野搵個Admin做都得，變相令一個本來係好重要嘅角色變得「好流」嘅原因。

窮生查一查維基，學術上所謂一個健康嘅HR行業，佢地要做嘅野應該有以下範疇：

• 人力資源的策略規劃
• 招聘篩選
• 薪酬管理
• 培訓發展
• 人力資源規劃
• 績效管理
• 人員激勵
• 菁英人才管理（Talent Management）
• 領導力發展（Leadership Development）
• 勞動關係

係香港嘅職場就當然不用分得那麼細，HR熊小姐同我講，主要分３大範疇：

• 招聘篩選
• 薪酬管理
• 培訓發展

其他工作就按實際需要融入呢３大範疇嘅人入面，而大公司多數將HR部門再以呢３大範疇細分，各自做唔同嘅野，各施其職。

HR小姐，你憑咩覺得公司要請你？

呢句野可能HR小姐問人就問得多，但係有幾可會撫心自問一下，自己坐係呢個位，到底係需要乜野SkillSet同態度，到底憑乜野你可以坐係度in人/Train人呢?

係3個範疇入面，我個人認為薪酬管理(即係計糧)係最悶，所以聽HR熊小姐講，做計糧一般人工都高少少。原因一來我覺得真係悶，因為d野機械式，要好準確。而當中有個point令我同HR熊小姐都唔鍾意嘅就係，Ｄ野唔會變，工作冇可塑性。所以佢本人畢業之後都冇打算入薪酬管理果範，最後入左招聘篩選。

得罪講句，作為一個HR，如果我問你”你憑咩覺得公司要請你？”而你只係答我你處理過幾多幾多CASE，睇幾多幾多個HEAD COUNT，我就會覺得呢Ｄ未夠專業，因為呢Ｄ野只要公司夠大，你一定會有機會處理到。我更想知道嘅係你作為HR，如果你話會計部係睇住公司死嘅資產，咁HR就係睇住活嘅資產。幾蠢嘅人都會明白，請著個好嘅同請著個差嘅，對公司影響有幾大，所以你對「人力市場」有咩想法，就好影響你請邊D人了。

HR要對人力市場質素有了解，HR對市場定價更加要熟悉。即HR本身應該係一個不停要更新資訊嘅工種，但反觀香港的HR，返工連上網都唔准，上下FACEBOOK都比人鬧，最驚嘅就係，你諗住上Linkedin update下自己，你阿頭可能會問你做乜返工玩電腦，你都咪話唔悲哀，所以如果係做培訓發展(training)嘅HR，好可能最需要做training嘅就係你(甚至係你上司)！

HR見工貼士千年不變

我諗大家如果有睇開HR熊嘅文章，你會發現佢比較好寫呢類小貼士，原因係呢D野一係就常識，乜野唔好著短褲見工呀，E-MAIL唔好用D搞笑ID。如果連呢Ｄ野都唔曉，其實你睇乜都冇用，因為你根本常識都欠奉，直接出去見工俾人話下可能仲適合。而另一個原因就係，佢好清楚其實而家個人力市場變得好快，而呢Ｄ咁嘅見工小貼士係多年無變，著重嘅地方係而家嘅眼光黎講已經係捉錯用神。出黎社會做野，同係學校最唔同嘅係，學校樣樣都有「既定答案」嘅玩法，係職場係此路不通。不過大眾仍然係喜歡有人提供答案，令佢地心靈上有個依靠，而職場唔係講心靈，而係講思路的。

好多時如果你唔係上左神台嘅HR，你日常面對嘅人都好可能係年青人輩嘅職場新鮮人。對於我地呢輩黎講，佢地而家經歷緊嘅野，對我地黎講都不過係幾年前（絕對不過十年！絕對不過十年！絕對不過十年！）經歷過。每代人都有勁人有弱者，而家新一代年青人到底點分優劣？好多HR呻緊而家D後生仔好自我，到底點解會令到一代人變成咁，HR又有冇諗過?如果你今日仍然仲係講緊，因為少子化同經濟起飛令上一代集中資源俾呢代，令佢地被過份溺愛。咁你只係用緊上一代識嘅野去解釋下一代，只能算係一個普普通通嘅HR，亦都反映左「職場老屎忽」其中一個通病，就係接觸新知識嘅機會比年輕少，活係舊世界。

HR代表了企業精神

係<<頭盔>>入面，有樣野３位HR都提到，HR係代表公司，如果你話CS (Customer service)係代表代表公司對外，咁HR就係代表公司對內。所以一間公司管理得好唔好，如果你係客，你可以打去CS試下佢。如果你打算求職，咁見一見HR又的確可以了解呢間野掂唔掂。

記得係幾年前，我上一間上市公司見工。我一出LIFT個氣氛已經打個突，烏燈黑火，個HR帶我去一個都唔算係房嘅地方，一地都係海報。D人態度串得黎又懶散，結果我用左20分鐘打發左間公司就走，返到屋企我第一件事就係上網睇下有冇方法可以造淡呢隻股票，結果雖然都冇，但係呢間公司上市一如所料由幾年前八毫野跌到而家得返毫幾，係間咁嘅公司做，你又會有幾投入呢？

到底另有什麼原則令年青一代有呢個大改變？老屎忽又有咩長處同短處？下一篇續談！