誠哥臨別贈言-女朋友論的思考

前日是長和系，包括長和、長實、長建及電能一齊公布業績，當然大件事到要令長子李澤鉅急急係北京在經濟客位返黎出席呢個業績發佈會。幾乎原因都係同誠哥宣佈退休接捧有關。睇住呢位超人，由我懂性以來佢已經係首富，佢投資既業務之多，而且同世界既關連性，我諗佢係我心目中永遠既香港首富，對於誠哥，我係由衷地尊敬他的毅力、識見同智慧。

先唔講業績，包括睇到口水都流既電能特別息了，因為窮生剛從日本回來，落機無耐想講返Ｄ輕鬆少少既話題，最重要係我都冇買（哭）。因為一路以來長和系既業績發佈會，焦點都唔係數字上既野，而係誠哥既金句。冇錯，佢真係幾乎年年都有金句，今年多左唔少後生仔睇佢既業績發佈會直播，今早我見到最多既，就係會中提到之前有一名男大學生稱，女朋友向他表示「冇樓唔同你結婚」，李嘉誠指如果自己是該男生，就會向女方說「你趁而家後生，你快啲搵第二個！」誠哥少有地講呢D咁「人性」既問題，一向惜字如金，字字珠機既誠哥都會講呢D問題，可見呢個問題係香港有幾嚴重。

誠哥的創業之起點

我認為佢會講呢番言論，多多少少同自己後生果陣有關。誠哥好早已經有創業志向，但係因為佢當年係逃難來港，父親又早逝，佢算得上係白手興家。係佢果代其實男人諗買樓係好冇大志既行為，因為男人有錢應該投放係事業之上。當然而家時代唔同，買樓變左係好多人人生既終極目標。係誠哥既心目中，如果一個女人係男人事業起步之初已經希望佢將所有積蓄都用黎供層樓，係令個男人冇左發展事業既能力，90既誠哥有此想法實在不足為奇。而係佢果個年代，當然係由男人買樓啦，所以佢口中講無樓唔結婚，講緊既係如果果個女仔叫個男仔買樓俾佢住先肯結婚既意思，咁呢個當然就係佢口中所講「不正常到極」。

嫁俾我還是嫁俾層樓

縱然誠哥係有份令到居住問題成為一個問題既人，佢亦係最早提醒年輕人「量力而為」既人。父幹不是必然，就算有，亦都唔一定要俾你。有，當係bonus，冇亦唔需要太過失望，因為自己賺返黎既錢，先係洗得最開心既！記得係電影《一念無明》中，方皓玟既角色Jenny係教會既爆seed戲，當中一段對白「我係一個普通女仔，想30歲前建立家庭，生小朋友，後嚟同阿東準備結婚，係何文田半山買咗個單位。不過之後係新聞知道阿東(余文樂)屋企出咗事，阿東入咗醫院再無供樓，阿東亦借落孖展攪到有人要追數。」後來對住阿東講：「其實我好憎你」。呢一段戲真係寫得好好，貼地得黎，講到重點。係好多香港女性心目中，都係好似Jenny咁諗，30歲前建立家庭，生小朋友，買層樓開開心心咁生活。當中Jenny仲有份一齊供架！好似冇乜問題。問題就係，其實佢真正想要既，只係呢種人生，而唔係阿東。

不宜對自住樓FF太多

香港對樓市基本上已經到左宗教般既狂熱，真真正正做到無樓無高潮既年代。但睇返數據，稅務局以2012年3月31日計算，香港共有201萬人以個人名義持有物業，當中包括和別人聯合持有。以2012年香港人口715.5萬計，其實不足30%。你仲未計D人只不過係聯名，事實上買得起樓既人，從來都係唔多。就算俾你買得起，對自住樓亦不能FF太多，事關就算你係樓平果陣買左又好，貴果陣買又好，自住樓一般都唔會賣。能夠令你增值既係第二層物業。所以以投資角度睇樓，你就會比較可以理性分析今日既形勢，財富除左樓市之外有冇其他回報更高既地方可以投資？香港既樓市又係唔係繼續有好既回報呢？呢點我冇確實答案，不過大前題係，好唔好市，買定唔買，首先都係睇你有冇能力買。係自己既能力，唔應該係他人既能力。

最後帶一帶頭盔先，其實以上講既野男女都適用的，所謂己所不欲勿施於人，尤其係將會同你行一世既伴侶，如果你唔係將佢放係第一位，而只係著重自己既人生路，咁你後悔既機會係非常高。因為愛情真係唔係投資，投資係講回報，亦不會集中一項投資，我亦唔會投資同一樣野一世，如果你當伴侶係投資，你就思考下我上面講緊D咩喇！