[震驚13億人]兩份工舒服過一份工的道理

過左初七，今年的新年接近尾聲，相信大家都開始收拾心情，返學既返學，上班既上班。新既一年，有冇打算挑戰一下自己，改變一下現狀，令自己更上一層樓呢？如果你日日朝９晚９，做足１２小時，生活只能剛剛夠生活，你能唔能夠想像你重可以捱幾耐？

不能停下，為了明天的麵包和水

窮忙最恐怖就係不能停下的壓力，下個月既租金、生活費，種種開支令你終日忙過不停。窮生係呢年半，收過好多呢類窮忙９０後既pm，希望窮生可以俾少少意見，脫離窮忙。可惜往往聽完我既意見之後，佢地都係嬲既多，點解？因為有一半人以為，我可以俾多少投資建議佢，等佢可以係股票市場賺到錢，改善生活。而然佢地唔明白，世上豈有咁便宜既事？你已經咁忙，邊有時間去留意市場？而叫得窮忙，你更加冇本，你係咪天真地打算窮生有點石成金既能力，可以點一隻入場費又低，又一下子升幾十倍既股票俾你窮人大翻身？係既話真係先承蒙錯愛，我並冇咁既能力，請你搵過第個，搵到記得通知埋我！

兩份工舒服過一份工

事實上亦唔係個個都希望做富一代，要發達。尤其是當你仲係窮忙族，根本連生活都搞唔掂既時候，更多人係想先掙脫呢個窮忙既現況。而當你做到隻狗咁既時候，窮生就會同你講：「撈多份啦！」你冇聽錯，我係叫你日日朝９晚９，做足１２小時，仲要撈多份。好唔人道呀可？唔係喎，因為雙職族，甚至多職人士，活得更自在，更舒服！

其實個邏輯就好簡單，當你所有收入來源係來自一點果刻，冇左佢，你係立即令自己既收入組合100%崩潰，就算係打工皇帝，冇左份皇帝工，都會面臨巨大收入消失而令生活無左可持續性既危機。窮既就更加唔可以冇左份了，縱使你份工可能係做足１２個鐘都係得１萬。

如果一份１萬既工，變左２個６千既收入來源呢？冇左一個，你都仲有６千，會唔會令你既生活組合更加有彈性？你唔洗因為怕冇左份工而明知underpay都要做落去，你有時間，有空間去物色更好既角色去發揮，而撈多份其實反而有機會令你空出時間去學習，例如投資、創立小生意等等。

鼓勵多勞多得，「slash」把腐敗的勞動風氣扶正

傳統既正職工作，好處係令你唔洗擔心咁多，因為你只要做野不過不失，坐係公司一段時間，就會有一個固定收入。唔係話咁樣唔好，問題係，做耐左，你好易會迷失，因為你好容易會比份工框死左你既SKILL SET，長遠對你同對公司都唔係好事。擁有多職工作，係接觸唔同範疇工作既時候，學習唔同既技能，認識唔同既對口單位。工作既過程除左公司得益，對自己日後既發展亦有幫助。當你有左呢種動力，你唔單單係為左公司而努力工作，而更多係為左自己既名聲同將來，你對工作就會更加投入，係工作之中得到既滿足感亦會增加。公司唔需要白費金錢養冗員，你都唔洗因為怕冇左唯一既收入來源而擔驚受怕。

以窮生自己為例，我有一份穩定既正職，雖然都係５天８小時工作，但由於我既工種係Project Base，比較可以自己管理時間同進度，我並唔需要８小時不停做做做，更多既時間係用黎諗點去做得好，點分配資源同時間。變相我可以係返工既時間處理自己公司(我已經分唔到邊份先係副業)既問題，活用科技可以隨時同我既員工溝通，下達工作指令。

而我既公司係沒有全職員工(包括我本人也不是全職老闆)，我亦都容許既員工享有彈性，我大多數既員工都唔係得我呢度一份工作。而佢地都異口同聲講，人工我地未必高，但我地呢份工比較舒服彈性。同時我作為老闆，都傾向鼓勵員工發揮自己所長，如果員工有新想法，甚至可以提出合作方案黎增加自己既收入，公司亦可以有所得益。變相我要花特定時間，係特定空間工作既機會減少，當我既公司穩定落黎之後，我一日工作既時數冇明顯增多，收入卻比我既上司還要高，呢個就係多職反而更舒服既結果。