從青春的苦澀看什麼是長大

窮生成日都話港台電視係好高質，今集鏗鏘集又係一部佳作！呢一集係BASE ON2兩年前4位追夢既年輕人，佢地係當年各自寫左封信俾２０１７年既自己，今集就搵返２年前呢４位９０後年輕人出黎再睇返封信，再講返呢２年做過既野。我成日都話，深刻既野往往唔係Ｄ偉大浩瀚既題材，而係細膩窩心既小故事。由呢４位都幾唔同既年輕人，我地又可以得到咩啟發呢？

特別招呼歐陽廣榮：你應該要學會原則的重要

歐陽廣榮可算係４位當中，當年最有話題既一位，因為佢一開始已經打住「親建制，搵第一桶金。」既心態黎追佢既夢。今日睇返，佢自己都明，少年你真係太年輕了。呢Ｄ所謂滑頭既人，香港真係大把。但係天真到係電視節目上咁真心講入黎係攞著數既人係唔多（笑）。我諗佢係上集出街之後３個月左右，都好清楚自己呢條從政路都冇運行，所以轉行都真係好正路。但係佢真係要由失敗中吸取到教訓。

個人覺得佢果part係最值得睇，係在於佢自己係節目中都講，而家睇返自己一開始，一個nobody，係好似無啦啦打得入既得利益者既群體。呢樣野正正要告戒香港典型既＂醒目仔＂年輕人，我知你明白「識人好過識字」既道理，但係你一個小朋友，出黎呢ｄ公開場白，參加商會。你冇人冇物，點解我要比你埋堆呢？商業社會都係利益掛帥，冇人會無條件幫你，你首先要問，你可以帶到咩好處俾人呢？唔好一味狗衝埋堆想痴著數，人地係商場打滾多年，唔係傻仔。

講到如果要同歐陽廣榮講句說話，窮生就要提佢原則既重要。典經香港仔，靈活變通係好事，但係唔可以冇原則冇底線。一個人冇原則係冇人會信你，因為你講左咩，聽日都可以唔算數。你吹幾大幾大，人地最多俾你呃一次。你成世人流流長，你可以呃到人幾多次，呃到幾多人呢？求財眼光要長遠，利益要睇可持續性，做生意係講win win的。

追夢不是問題，但你要有路線圖

片中另外兩個年輕人阿Lik同Charmaine，都係另一派幾典型既後生仔。不甘於既定既生活方式，係上一代既陰影之下尋求突破。窮生幾鍾意有呢種態度既後生仔，因為冇不安於現狀既人，呢個世界又點會進步？不過呢種後生仔，好多都係「恃後生賣後生」，覺得自己有既係青春同時間就係揮霍。其實青春同錢一樣，有，唔代表要chur盡。你有錢都唔會洗盡啦？青春同樣都係，後生，好處係nothing to lose。衰左冇咁傷。但唔怕死，同衝去死係兩回事。珍惜青春的日子，好好定下路線圖。３年５年，俾個短期目標自己，唔好得個夢，漫無目的咁行。

好似阿Lik咁，有大公司既見習生，fg有15k算係唔錯。唔係話唔可以辭工，但係窮生建議可以先諗定辭工之後做ｄ咩，set好哂時間表，一辭工就可以落力去實行。咁樣好過辭左先算，1個月15k，半年已經9萬架喇！你辭工係有機會成本既，所以唔係唔可以追夢，而係你要對你既夢有d計劃，有d承擔先得。

長大就是明白人生充滿無奈，但不是叫你放棄！

呢個節目強語長大之後睇返以前，其實呢樣野我相信大家都經歷過。你可能會覺得以前自己好幼稚，可能會有「點解咁蠢既野都做得出架！」既諗法。歐陽廣榮係節目尾段都有寫到一句：「人愈大，就發覺年少目標係好難達完成！」其實長大其中一件事就係明白到，呢個世界你唔係主角，冇主角無敵呢件事發生係你身上。有好多野係徒勞，有好多野係點努力都失敗。咁係咪day one就唔應該開始？其實唔係，人生充滿無奈，但係人唔係只係睇成果，係挑戰既過程，我地會不停進步變強。《孫子兵法》中說：「求其上，得其中；求其中，得其下；求其下，必敗。」所以長大唔係叫你放棄追夢，而係叫你明白，追夢只係個過程，結果並不是最重要。