香港的住屋問題，由2012年講到而家。由前特首梁振英推到更加白熱化，再由現任特首林鄭月娥引發更多討論。各大時政節目，民生節目都離唔開講住屋問題。下面我放左最新既２個港台長青節目，都係講住屋，都係同共居有關，窮生需左講所謂居住正義之外，都想以市場供求，同貼地少少既理據講少少基層住屋既發展方向，作為政府，所謂ＮＧＯ甚至係業主都應該多Ｄ討論同考慮一下。

先容許我提少少貨櫃屋先，呢件事唔會用好多篇幅，因為呢樣野根本冇必要係香港出現。香港根本係土地問題，唔係起唔到樓，只有起唔到樓既地方先有需要用貨櫃屋，新界果Ｄ貨櫃屋犯法就應該取締，原因係違反土地用途。政府如果有地，就應該起樓，冇必要做一Ｄ咁臨時性既房屋，講完。

講到共居，窮生又要再一次點名批評任真小姐同好多盲撐共居既人士。窮生認同共居係一種可考慮既生活模式，我唔認為呢種係一種生活倒退，而家唔係７２家房客，2008年日本已經有套日劇《Last Friends》係講「SHARE HOUSE」，精神在於分享空間，分享生活，唔係純粹既「同屋」。係「星期日檔案。我們共居吧 !」你可以睇到共居未必一定平過劏房，甚至根本同「冇錢」冇直接關係，主要係睇你既「SHARE HOUSE」係點定位而已。

而我批評任真小姐係因為，佢本身已經唔了解共居既本質，而呢班人係不停踩低劏房黎推共居，以共居黎「解決」劏房問題。到底共居係唔係一個「解決方法」？窮生就唔係咁睇。２者只係２種商品，２種住屋選擇，沒有誰比誰高尚。亦沒有所謂JOIN你「好宅」計劃的才是良心業主，佢係片中都提到啦，業主都會問：我JOIN你有咩好處?

講到尾都係商業考慮姐！

窮生對呢Ｄ問題永遠都以商業考慮為先（有社會責任的企業），其實劏房並冇問題，問題出在劏房好多都唔安全，呢個係規管問題。事實我可以肯定，劏房既需求一定比共居大，原因正正係任真小姐的盲點，就是兩者功能的分別。任真小姐主張多個家庭共居係大問題，一家人本身已經難處理，仲要幾家人住埋一齊，有男有女有老有少，係咪真係適合？台灣做共居做得好好既玖樓都要有嚴密既見試先可以做到配對（仲要人地只係配單身客）。你「好宅」如何解決家庭之間的糾紛？所以你問家庭，佢地都係純粹租金考慮，邊度平就租邊度，同共居／劏房冇關，甚至佢地根本比較喜歡劏房。

以生意的角度，如果窮生有錢，我都會２條腿走路，２邊都搞。做安全劏房解決家庭住屋需要，再搞千呎的「SHARE HOUSE」，以服務性共居概念經營。因為年輕人唔鍾意做家務，怕麻煩。有服務的共居公寓就Fit哂佢地，貴少少都值得租。

所以講到尾，市民會用腳投票，要搞得好，最緊要貼地，而最貼地既，永遠係市場。政府要做既，就係確保生命財產安全！

鏗鏘集：求安身

星期日檔案。我們共居吧 !