窮媽媽貧窮人生的反思

早排出席了友人的網台節目，講左好多唔同朋友既八卦。令我發現，原來出賣朋友同親人既故事，係最多野可以講，同埋夠因為佢地同你夠熟夠親，連講都講得特別細緻具體，悉逢呢排公務繁忙都未諗到有咩可以同大家分享，就出賣下身邊既故事啦，仲要一係唔出賣，一出賣就係至親，都真係有誠意喇掛！

好多人都問我，我既財商智慧係點煉成？其實唔多唔少同我成長環境有關，而尤其一開始最主要既學習對象就係我媽媽，但係如果你地以為佢係財商大師就大錯特錯了！佢可算係出生於baby boomer既失敗者。同好多baby boomer一樣，佢受既教育唔多，小學畢業已經要出黎養家，做過假髮，打過住家工又抹過電話。但因為個人勤力肯做，貴人運都不錯，抹抹下電話，可以俾人請左入公司做messenger，仲係外資銀行tim！

每份工作都可能令你學到終身受用的技能

抹電話都比人發掘得到？到底窮媽媽有咩過人之處？原來係佢打住家工既時候，服侍既係一對洋人夫婦，所以慢慢令佢學識左英語溝通，又由於佢一次被派到外資銀行抹電話，被鬼佬發現呢個清潔女工識英文，所以請左佢返黎，令佢踏上左大半生中環OL既生涯！

幾十年前既大公司，行既同而家日資公司差不多，d人好興定期調到不同部門做野，此舉令窮媽媽學習到好多新野，而佢亦一邊返工，一邊讀夜校，最終考到中五既學歷！仲因為調到會計部同電腦部，習得基礎既會計知識同電識知識（佢係學過少少Pascal）。到今日佢六十幾歲，我都唔敢話自己用excel叻過佢。但係點解一個好似行得好順既人，會過住貧窮既晚年呢？

沒有財商，怎行也一樣

講到呢度，要講下佢係幾十年前識既一個好姐妹。就係係銀行入面做荼水既姐姐—霞姐。霞姐同窮媽媽年紀相若，由窮媽媽一入銀行做OL已經共事，日日都幫忙洗杯沖咖啡，有時窮媽媽會入荼水間沖咖啡順便吹水，感情真係好好。不過霞姐生性勤儉，係慳得一蚊得一蚊既人，相反窮媽媽完全沒有理財知識，後生時候把所有收入都交俾婆婆（姐係佢阿媽），就算結婚之後，有錢都會買哂屋企物資，全不剩錢。窮生細個係好幸福架，食好多好野，又衣著光鮮，但所有野，都係要還既！

係我幾歲既時候，唔知點解好既又唔見好埋一齊，佢兩個先後都同丈夫離婚，做左單親媽媽。霞姐就買左個荃灣既單位住，當時一個荼水姐姐供樓仲要養２個仔真係辛苦到成日都喊。而窮媽媽就租板間房，我地一家三口係板間房住左２年，好好彩之後就申請到新界公屋上樓，從此窮生就由港島人變左新界人了…

雖然我們環境變差，但媽媽既消費習慣仍然冇改變。為既就係唔想我同家姐覺得自己變窮左，所以仍然係用哂D錢飲飲食食，所有野都係買新既，我咁多年都冇買過舊書架！輾轉十多年過去，霞姐層樓已經供完，多出黎既錢轉為送兩個仔出國讀大學。而窮媽媽因為沙士而被裁，一貧如洗，在我中三之後已經無力支持我升學，窮生的工讀生涯就由果年開始了！

愈高收入，愈需要學習管理金錢

霞姐的勵志故事當然值得我地學習，以我所知，佢最後再供多左一層舊樓，作收租之用。兒子如今已經三十來歲，已經不用她擔心了，真係見到都替佢開心！但對我來說，窮媽媽的故事令我學到更多，我日日係佢身邊，觀察到既野令我明白，她的收入最少是霞姐的兩倍，然而最後落得如此下場，同佢數十年完全沒有管理財富有莫大關係。

數十年完全沒有投資，也沒有買入任何保值得東西。她一直相信錢搵黎係洗的，用左既錢先係自己既。所以咁多年都冇諗過離開公屋，買樓自住。又因為公屋租金平，令佢多左錢再消費，慢慢形成左，簽卡渡日既習慣，一出糧就交哂卡數，冇哂錢呢個月咪又簽返卡囉。真係理財唔見佢咁叻，佢玩信用卡玩足２０年都唔爆煲，如果佢理財有佢用信用卡一半功力，都唔得掂！

她完全沒有支出和資產的概念，令她錯過了所有baby boomer都受惠的經濟起飛同資產增值，在好景(錢不值錢)的時候消費，在蕭條(大家都缺錢)的時候找工作。完全違反窮生所學的財商智慧，應該咁講，窮生一身的武功，就係將窮媽媽的武功相反地打一次出來的。有好多人成日以為，我搵多Ｄ錢咪可以解決問題囉，事實係，如果你冇好好學習管理金錢，中環人最後就輸左俾荼水阿姐！