城市論壇：施政報告同前瞻 首置上車齊盤點 觀後感

本來呢Ｄ論政節目就同窮生無緣，不過今次講既題目係樓，而且窮生自己都係呢班目標客群之一，就再簡短地講多少少看法吧！(我發覺自己年中介紹唔少港台節目，變左打手！哈哈！)

其實成個４７分鐘既討論，表現得最好係阮穎嫻小姐，理由好簡單，因為佢都係首置盤target既人。佢講得出作為用家，會點樣實際地操作成件事，而難得既係，一個經濟學人，佢同關教授成個節目都充當左社福界既角色，咁有愛心既右派，除左窮生本人都好少見（講出黎都真係會面紅）。

第一節阮穎嫻小姐講出左首置最勁揪既著數，就係進可攻退可守。如果可以原價賣返比政府，姐係我係一定唔會輸，只會嬴。呢個世界如果有一定唔會輸既野，係當埋條底褲我地都要去買既。因為一般黎講經濟分析上都會覺得而家個價似係週期既頂，多過底。好多人因為住屋需要都迫住入市（好似仿佛租一陣都會死咁）。咁如果有層樓係可以原價賣返比政府，雖然唔會嬴錢，但亦係絕對唔會輸錢，我就當你住５—１０年，價間如果樓市下跌，你層樓就變左係資金避難所，同時又係你本人既避難所，因為資產避免左價值下跌，呢幾年仲唔怕有租金壓力，住完１０年賣返出去，就好似唔洗錢住左十年一樣。

湯文亮由頭離地到尾，佢都坦白承認自己唔知月入５萬同７萬有咩分別，係佢眼中呢Ｄ都係窮人。但係我覺得港台請佢上黎都係唔錯既人選，不過比窮生揀，我會揀請左施永青先，起碼冇咁離地。雖然我係咁踩湯生，但係唔代表佢講野冇句中POINT，佢係最後一節就講到樓價高既重點。我地要解決年青人上唔到車既問題，唔係要用公帑起樓，平賣比佢地，因為你永遠都起唔夠數。冇地係一個大問題，成場討論所有人都明，而家為左要起呢Ｄ所謂平樓。要巴結地產商，你就知個政府幾冇實力。而家湯生一語中的，要令佢地上到車，就要放寬借貸比佢地，等佢地易Ｄ借到錢。呢個先係真係幫到後生仔上車。

點都好，所有消息到呢一刻都只係消息，好快特首就會公開呢個首置盤既細節，而家就唔花咁多文未去講Ｄ未定既野了。一有細節窮生會重要分析，因為件事都關我事。