[星期日窮生]個案分析-30歲真正學會修煉愛情

一個令人神往的星期日早上(因為明天都唔洗返工)，我床都未落係到睇手機，見到beautyexchange D post，有唔少網友都知，我係beautyexchange既fans，點解我可以同窮太拍到咁多年拖？都係因為佢地，只要每一次窮太做得唔好，而激嬲我，我只要睇一睇beautyexchange d post，個人就會豁達起來。情況就好似當你覺得”人生好難”既時候，看看非洲既兒童，想想自己其實比他們活得好多了，你就有力量繼續努力一樣。

今次睇呢篇文令我有興趣再寫一篇兩性關係理財既後續，就當係星期日窮太唔得閒陪我既一個小娛樂。

原文：http://www.beautyexchange.com.hk/forum.php?mod=viewthread&tid=745681

其實呢篇文我本來條題係想改<<關於心寒，我想說的其實是…>>因為真係太心寒了，原來真係有女人平時同男朋友相處得好地地，會單單因為佢搵得少而考慮終止呢場關係(老實講，我真係唔係第一次聽呢類故事，所以呢個post真又好假又好，都要講講)。

故事簡單講就係個女朋友同男朋友係30出頭，一齊左5-6年先發現男朋友搵得15k一個月，令女朋友諗緊好唔好搵過第個啦！呢個post就算係beautyexchange果邊都有唔少比例既人士去聲討呢個女事主既，等窮生今次就係呢個男事主既角度提出少少意見，理財意見又好，感情意見就好，總之希望佢早日脫出困境！

30歲幾多錢人工才覺合理？男人識女仔切忌死充！

呢個問題其實我都keep住有得閒問下自己身邊既女性朋友既，一般返黎既標準最少都3-4萬。有趣既係講得出呢個標準而女性朋友，大多都係搵緊2萬左右。姐係話「要搵得比我多」既情況係仍然存在既！好似事主呢類30歲搵15k既人黎講，應該唔少女人都會避之則吉，問題係呢件事係拍左5-6年拖先發現，大家有左感情先令人糾結。所以窮生一向身體力行，由第一次拍拖到而家，我好公開自己既環境，窮就俾人知道你窮，從來男人要得到女人既歡心，都唔止得「錢」一個方法。係市場學既角度黎講，你可以當自己係女性市場既一件商品，反之亦然。你點樣position自己就會影響自己得到d乜野，窮生係<<人渣磁石是自我煉成的>>一文中提到初步既邏輯。男人識女仔其實邏輯一樣，首先你要知道自己係想識咩女仔，之前position自己係去吸引你既Target Customer。

假設你係薏米，你就係去濕。你做乜要扮人參同人講你保肝益氣呢？我係去濕就講去濕，就會吸引到要去濕既人去買你。你死充你就會得到唔岩你既人，最後就係大家都冇好處，不歡而散。

浪費時間在不對的人身上，男比女更傷。

以資料黎講，如果30歲月入15k，咁之前幾年佢大概都不會高過15k呢個數，以一個大學畢年大約8年的人，入月15k，即係大約還完學費月儲5千儲左幾年。呢個人唔會係一個大駛既人。唔可以叫好好成績，但睇得出，就算佢洗，佢都洗左係呢段感情之上。呢個係有形既交往成本，而好多男人係20-30歲呢段事業摸索期，都會比女人睇唔起，因為大學畢業出黎，如果唔係神科，唔係創業成功，大體上廿中至尾都只會有二萬鬆ｄ，而係摸索期最大件事就係，所有野都未定，所以女友能夠影響你既機會就大好多。我聽返好多三十出頭既朋友講，轉工，轉行，買樓，結婚，生仔，創業，好多野都受到另一伴的左右。好既就冇所謂，唔好既，就會影響你未來幾十年既事業，例如係叫你移民，話你而家人工低，不如轉行好搵ｄ既。呢ｄ一切一切都係機會成本。所以邊個再話女仔呢十年青春就重要，男人就唔緊要，同你拖佢出去。絕對冇件咁既事！

致30歲以下男生，你正處於男性人生的最低潮

呢句說話我係大學時代經常同師兄講，情況不外乎就係當緊兵或者同女朋友升左唔同大學，比對方既組爸溝走左。我可以同各位年青人講一句，你呢十年係播種期(唔係果d播種)，呢十年你將會面對無數次覺得徒勞無功，不論事業上，感情上，甚至係家庭上。因為你畢業之後，比人踢出新手村，也都冇，面對公開的市場，你唔再只係同同年既人鬥，你係同所有年齡同國家既人鬥。你要做既野係儲起力量，裝備好自己，令自己成長。男生們，我們的主戰場在35歲之後。現在你只係刷緊裝，唔好怕失敗，因為你根本乜都冇，nothing to lose。錯左既，砍掉重練，沒有什麼好可惜的。

最後我要為男事主打氣，可能你今日人工係比較低。但係今日有個改變既契機，就係你既負資產女朋友要甩了。好好把時間花在裝備自己身上，目標清楚明確，到左果陣，女生自然就會被你吸引，女朋友係唔洗追既，只有從相處之中得返黎。成世人流流長，總會愛上幾個人渣。