十年前一個夜晚，我坐在尾班３７號巴士流淚。

上個月，一個落著毛毛細雨既夜晚。窮生出席左一位舊同事既婚宴。人到左廿尾既年紀開始會不停去飲，窮生係逢請必去的，因為結婚係人生大事，男人三十最大鑊既事情之一就係結婚。你既然要開始呢個咁恐怖既遊戲，我定必會親自黎送上祝福，同時送埋你單身既送後一程。

婚宴都係果ｄ野，乳豬為首八道菜次次一樣，成長片段、夫妻感言，都係果啲。成晚，我反而係不時留意果位幫我地上菜既小弟弟，見佢一臉稚氣，想必仲係學生，斯斯文文得黎有幾分害羞都幾得意。我唔係基既，亦唔係戀童。只係佢令我想起十年前既一段往事。

2007年8月17日，窮生當年18歲。正值卜卜脆之年。雖然家窮，不過十幾歲仔其實好易滿足。早兩年係網上做了點小生意，賺了數萬元，解決了學費的問題，仲有餘錢上堂之前食個full set大快活早餐，咁就已經覺得自己係中產生活架喇！

好衰唔衰見到自己就黎生日，年頭開始開左個股票戶口，幾乎日日Trade月月炒返幾千蚊返黎。完全覺得自己已經不用擔心生活，朝頭早執千零蚊，放學洗一半，儲一半。當時「我已經覺得自己好慳好生性！。」

今日打算狠一點，睇準時機在上午入隻熊仔，玩600蚊一格。果日我好準時返到學校，坐喺課室，lecturer好hea咁打開果本係黃金買返黎既果本教3D Max既書。教緊polygon同nurbs有咩分別既時候，我完全冇理到佢。我開住個分鐘圖，睇準timing買入。一路上堂，我根本睇唔到其他人，事關佢教啲野我一上年已經學哂，我爆四既高材生唔會同你係度浪費時間。結果午市之後，最多跌1200點，我直頭覺得自己係神。而通常覺得自己係神既人，都要付出代價。而家我仆得比所有人都快，兩個鐘後我就由天堂落左地獄。

有點年紀既投資者都應該記得，2007年8月17日，恆生指數於下午大跌超過1,200點，低見19,363點，但於收市前恆指卻因港股直通車傳聞，突然大幅反彈，反彈幅度超過1,000點，收市報20,387點，跌285點，企穩20000點以上水平。史稱大奇蹟日。果日，我打左靶。輸左副身家(其實得2-3萬)，輸左我之後要交既學費，輸埋自信心。我第一次係嚇到嘔，真係上上下堂衝左出去嘔。

由於事出突然，我搭上搭左d朋友。介紹左份可以彈上班，即晚出糧既兼職俾我。份工就係係五星級酒店中菜廳做婚宴上菜，姐係所謂既炒散。大家都知道，飲食業不嬲都係辛苦工，要快，要有禮貌。而做酒店婚宴，又係飲食業之中最辛苦既一環。我呢d成世人連m記都冇做過既人，由中四開始做既兼職都係文職，打下字，最多sale下野，無啦啦一黎就打大佬，真係有d驚。不過自己而家仙都唔仙下，要追返下期d學費，佢又有$55/h，的確係冇辦法之中既辦法。如果我係女仔，可能已經…..

第一日返工，撞正係生日，平時一定同女呀朋友呀咁去玩下慶祝下(果陣未識窮太)，今年都真係新鮮，算啦！自己隻獲，自己搞返掂！train完一輪，學識點用分羹，上菜次序走位之後，就落去食飯等開工。我仲記得我食食下飯個蛇頭同我地呢幾個新人傾左幾句，佢打量左我一下，對住我話：「見你官仔骨骨，都唔係食呢行飯啦，做乜咁睇唔開呀？」其實我都知自己一副書生格，如果唔係有人介紹，佢都未必會請我。所以我真係唔想衰俾人睇。應左佢幾句，上定去睇下個場先。

呢5個鐘，我呢世都記得。完全係打仗，成晚，我隻左手幾乎冇放過落黎，我對腳冇停過咁走。無論我點走，我都係慢過d老手差不多成道菜，我耳邊就不停聽到經理d粗口。我成晚完全諗唔到野，連覺得辛苦既時間都冇。今晚一個人都冇同我講生日快樂，就好多人同我講ｘ你快ｘ啲啦！6點做到11點半，終於完結。換完衫既我飛快地換衫趕上最後一班37號巴士。

巴士上面既人已經不多，我坐在上層左手邊第一排。我記得我坐低無幾耐，已經不由自主咁流眼淚，男人老狗咁樣我真係第一次。我隻左手幾乎已經抬唔起又伸唔直，痛到一個點係郁一郁已經針拮咁。而我知道我流眼淚唔係因為我痛，而係我知道明晚又要再重覆，最刺激既係我報左一連四晚都返。果種明明知道已經手都抬唔起，而因為冇錢，一日唔係冇左隻手都要返工既心情，令我絕望到流下眼淚。

「我以後都唔要再為左啲咁既原因返工了！」我不停自言自語。

果晚之後既事我都唔係好記得，大概就係我貼左好多”脫苦海”，收到好多sms都冇睇到就訓左。第朝不停嘗試抬起隻左手，勉勉強強又捱過左。

呢種生活我一共過左半年左右，其實最後１個月已經少返左好多。雖然做到一個月之後我基本已經上手，三個月之後已經追上其他人，原因有一半係我快左，另一半我係諗到辦法令所有人都慢左(笑)。係呢半年我發現work smart既重要，自己唔係運動型，就要想辦法用方法補自己既不足，更重要既係，果鼓動力。我唔知其他人，我果股就一定唔係正能量，係一股「以後都唔要再過呢啲日子」既負能量，帶我走出呢次困境。其實所有困難，係當下一定係令你感到絕望，覺得今次自己冇可以跨得過。但係人有時就係應該合埋眼，衝過去。過左之後發覺，原來呢個世界冇乜野搞唔掂。我到而家都相信，只要你俾d時間我，我係可以學識操作瑞士果部大型強子對撞機。

呢個暫時係我人生最有意思既一年生日，那些年，十九歲生日。