「港人首置上車盤」是敵是友？

有網友想窮生對特首推出既「港人首置上車盤」有咩睇法，縱使感到吃力，都仲係講少少啦！點解吃力呢？因為我得到既有關資訊唔多，如果下文有咩錯漏，歡迎更正！

首先，就咁聽！今次特首的確終於都想向青年人釋出返少少善。其實由公屋計分制開始，我話係香港地，年輕係原罪都不為過。香港大部分福利政府都係頭痛醫頭，腳痛醫腳。主要福利對象都係針對老人同低收入家庭啦！後者頗為合理，前者亦因為人口老化既問題，不能不早日作好準備。但係當社會強調發展既同時，點解對年輕人、未來既野又咁少幫手既呢？公屋計分制２００５年實施到而家，後生仔直頭稱得上係被歧視。點解年紀愈大既人，對公屋既需要就係更大呢？公屋以前作為上流既旋轉門，目的係令後生既勞動力可以因為交平租而儲錢向上流。姐係話，呢個本身係活化社會勞動力，令經濟發展一個重要政策。而家變左係千秋萬世霸住間公屋，租戶有責任，政府責任更大！度旋轉門事實係政府玩壞既！

今次林鄭特首強調「香港人」同「首置」，可謂合哂後生仔心水。在窮生看來，是公屋系統的變奏，此文章先短評窮生已知的事，後來提出問題。

點解窮生會話呢個係公屋系統既變奏？因為佢好明顯係想解決住屋需要，強調你唔會係當中賺到錢。而因為公屋事實上已經玩死左，果本咁既輪候冊多人到排隊投胎都快過排公屋。所以政府打算中間劏開，一來唔需要再狂起公屋，下下等收租返錢太慢。新樓有人買就可以快少少收返一定數量既錢，條數自然唔洗咁衰。二來，如果推出港人首置，部分係唔係都入左紙排緊公屋既後生仔可能又會退飛轉買呢ｄ新樓。變相都減少左輪候冊既人數，算係兩嬴！由於首置盤的售價會考慮巿民的負擔能力，與市場價脫勾。出到黎7000蚊呎左右，出黎個lump sum應該係二百尾到三百尾咁上下。1-2成首期都係30-50萬，就咁聽都真係幾吸引，會吸引好多真正用家考慮，結婚生仔既成本最少平左200萬。

問題就出係佢地既定位，有一說話首置上車盤既受助對象唔會同居屋重疊，而係定係比居屋高既LEVEL，入息限額料介乎52001元至72000元。如此一來又同上面果講定價6-7000蚊呎既所謂可負擔價錢有矛盾。而且呢類型既資助房屋又點解要定到咁高呢？係居屋或以下水平既人都未搞得掂既時候，開多條無謂既戰線出黎又係咪合適呢？呢個就要等施政報告果陣揭曉了！

窮生有少少問題想問：

如果買入價與市場價脫勾，咁賣出價呢？

如果我假設今日已經有個「港人首置上車盤」起好左，我用左呢個所謂市場脫勾價買。咁如果我３年後放出，而３年後樓市下跌４０％，我個賣出價會係點？

如果原價賣，咁就真係好著數。買相唔洗錢住左３年，「港人首置上車盤」同公屋最唔同就係公屋我係交租，就算而家公屋好平租(就當係$1500/月)。我都起碼知道我一年用左＄１８０００開出交租。如果我買左”港人首置上車盤”係原價，咪姐係一定封左蝕本門？仲要你果ｄ係供款，政府變相幫你儲錢。

是否原用居屋的抽籤方法？

如果上一條問題係可以原價賣出，申請人數一定多到飛起。申請人數比居屋高數倍係預期中事。而咁亦令居屋變成四不像，吸引力完全冇哂！

有幾多供應先？

呢個問題其實先係最重要，唔好搞到一陣好似港人港地咁，原來得一幅半幅係。咁真係等於用一幅地搞一場六合彩，對社會係完全冇幫助。房屋既野一係唔搞，一係要搞到好似公屋居屋咁，有一套長年既系統，不時有新屋起到出黎，唔好令呢個特別既市場太細。甚至郁左ｄ現有既公屋黎搞反而無大問題。

講明上車盤就唔好出現３房則

既然叫得做「港人首置上車盤」，而佢又屬於資助房屋。姐係話佢要做一套好ｄ既退場機制，吸取左公屋既教訓，唔可以俾ｄ人千秋萬世，要真係做到旋轉門作用。所以除左特首講既面積、設計同裝潢方面都會較為樸實之外。用家心理都重要。我地留意私人市場既人都知道，上車客一般唔會住你第一層買既樓好多年。原因係因為廿尾到三十尾，人生既需求轉變好快。一條麻甩仔有間房就得，買樓多數因為結婚，兩口子，二百尾三百中差不多，因為２個人唔洗好大，有房有廳，最緊要大家唔係搵好多，lump sum細才是皇道。

到左生小朋友，你果個上車盤係多數都唔夠用。果陣你開始會想換大，三房既需要就咁黎。所以如果你想年輕人流動，就不可以有三房的上車盤。一般200-350既1房同2房已經好夠。否則lump sum細又有三房，除非發左達，否則呢間屋一定唔會再賣出，公屋果個千秋萬世情況又黎。要健康，呢個「港人首置上車盤市場」一定要活躍。生仔想有大ｄ地方，請努力搵錢換樓。