難為人工定分界　多角度看薪酬定價

8-9月係畢業生就業既季節，又係好似我地呢ｄ老鬼轉工旺季既終結(因為要趕係fg湧出黎之前搞掂)，人工就當然係大家想執著最緊張既一環啦，網上見到篇有關講有間公司有員工因為同工不同酬，差$500而反面兼辭職既文章，你就知道人工呢樣野係幾咁重要，$500已經可以同你開拖，唔係錢既問題，係條氣唔順既問題。咁到底人工既構成係點，定價又係點黎，今次窮生就圍繞「人工」兩個事，深入咁剖釋一下，等大家叫價之餘有d深度，唔好好似街市婆咁等個嗌字啦！

雙方的需要，構成薪酬指標的基礎

係講一樣野既構成，我地要先從基礎講起。而人之所以要打工，係因為要搵食。老細之所以要請人，都係因為要搵食，出發點係一樣既。問題係大家個立足點唔同，矛盾好容易會產生，所以無論你係邊一邊，你都最好了解埋對方既角色同利害關係，有助你作出更精明既決定。

係老細既角度，當佢要定立一個職位既薪酬水平，除左參考市場既同業出價之外，主要就係計返呢個職位可以幫公司帶黎幾多收入。好似sales呢d行業就最易計，多勞多得。就算係back office既人其實都係一樣。要幾多back office既人去back up一個sales團隊，你愈少人都back up到，你人工咪愈高囉。又由於back office比較前線sales難反映自己價值，所以經常都出現under pay既情況。呢個就係精明老闆要平衡唔同部門利益既學問所在。

係員工角度，諗既就唔係一個職位既薪酬水平，而係「自己」。一般人係點定既呢？就係用自己既生活水平黎定。你一個月要洗$10000，讀個學位用左$200000，你之後要點點點。好多時就影響到，你點先會覺得個人工係「夠」。

不要試圖在工作反映所有成本和價值

其實呢個叫價位有少少似做生意，你當自己係商品，供書教學用左幾多就係開發成本。你會唔會SET個產品售價SET到話賣幾多幾多要1年內回本？唔係唔得，但現實結果就係大多數咁諗既公司都會係1-3年內倒閉。打工打則不會倒閉，換來的就是找不到好的工作，影響前途和發展。

另外一點就係，正如窮生以前既文章都提到，老闆請人係買指定的勞動力。例如我請人做會計，我只會Pay for會計的人工。你識其他同工作冇關既野，對我黎講係冇價值，甚至係負資產。所以如果你係周身刀，你好可能經常會覺得自己係under pay，原因好簡單，就係因為份工難以用盡你有既能力。呢個時候一係你要想得通，一係你自己做老闆吧！

不同階段對薪酬看法大不同

窮生認為打工仔對人工的看重程度，應該係一個倒轉V型的圖。0~3年經驗既人係一張白紙，係描繪自己成個職業生涯既重要起點，如果人生冇乜重要轉捩點，頭3~5年你係職場學到而Skill Set會將你之後既路定左型，所以應看主未來發展而不是起薪點。到5~15年呢段時間你可以慢慢看重人工，因為你既年輕大約已經係廿尾到三十尾。事業上可能已經衝到上中層，生活成本都會因為想進修、結婚、生子……而增加。由於你既Skill Set已經定左，如果有一定成績的話也應該有不少公司會欣賞你的能力，這是一個收成期的開始。之後又會下降既原因，唔係你的人工真的下降，而係當你去到一個水平，你既收入同資產基本上你已經可以滿足到你既消費需要，到左果陣你就會傾向做有成就既野/有興趣既野多過純為錢打工。

你的定價也影響我的定價

呢個睇起上黎係阿媽係女人既觀點，其實都值得講下。當經濟好果陣，而社會又穩定果陣，大家會好放心消費，生活成本上升，要求既收入自然上升。又因為消費上升，老闆生意亦好左，都唔介入用錢留住員工，幫佢賺更多既錢。

但係以香港為例，你話係唔係經濟又好，社會又穩定？最好窮生自己認為未算好樂觀，但尤其呢兩年大家好似都好捨得消費，所以就算經濟唔算係好好，因為失業率低，就已經夠令人工扯高，對我黎講百害而無一利。從博弈的角度出發，這兩年在好市的時候儲錢，當大家都唔儲而你儲，過1-2年壞市到來。所有人因為生活壓力而降價，我說不定可以休息一下，甚至逆市擴展！所以「別人貪婪時恐懼，別人恐懼時貪婪」，講就易，做唔做到？就睇你今日準備左幾多了。