[窮生中伏個案分享]想過老闆癮的，千萬別做生意！

都好耐冇寫創業有關題材，早前因為事務煩忙，出左事都冇時間同大家分享。就趁呢個月有時間，用一個例子講下中小企致命的錯誤吧！

事源就係窮生一直同一家到會公司有合作，但由早2-3個月開始呢負責人就聲稱公司注入左新投資者，之後就開始出事，最嚴重既情況就係，收左人錢，唔記得整野送去場地俾人，姐係甩單！

要知道作為活動搞手，細公司就由Admin/HR負責，大公司直頭會用PR公司。你估下如果係活動果陣所有食物都冇送黎/遲左2-3個鐘黎，會發生咩事呢？細公司就係負責員工／搞手當災，如果係PR公司？分分鐘比客告。有見及此，就係度提提各位同業小心之餘又講講做生意不可不注意既幾點致命傷，做得唔好，分分鐘斷送江山！

B2B重誠信，B2C講口碑

開得公司，你有既唔再係個人，BR有你公司地址，你個品牌本身要有分量，人地先會睇得起你。而點樣先可以有份量？做野要有操守，質素要有保證，呢Ｄ係基本。要最重要係，你覺得自己做既野係重要，你覺得公司既聲譽係重要。

以上面既CASE為例，佢作為一間餐廳果部分，佢係B2C(business to customer)公司，佢最重要既野就係做好食物比客人，客人平均消費唔多，係做量。點先有量？就係人客食完覺得好，介紹比人。所以你要做既野，最重要都係食物要好！所謂有口皆碑就係咁！

而作為到會公司，佢係B2B（Business To Business)公司。食物既質素固然重要，但係明白客戶點解需要呢個服務，呢個服務最需要係咩同樣重要。因為到會唔同餐廳，客人係先比左錢，到當日收食物的。所以對客人黎講，準時有貨到係最重要，好唔好食反而係其次。當你接二連三漏單，仲點會有人會冒住孭獲既危險去幫襯你呢？你係公司職員，就算你知道果間野Ｄ野好食，你敢唔敢？做B2B生意，就係一門唔好令自己同人地瀨野既藝術！

年輕老闆，切勿打工仔心態

近年，後生仔創業人數激增，好多人廿歲出頭，拿住舊錢都想一嘗做老細既滋味。其實係好既，因為做過老細既人，思考既角度會全面Ｄ，以前打工你係一個小齒輪，你只要做好自己部門既事就可以，甚至你唔會考慮其他部門係點做野。做左老細，你會以公司整體黎考慮，學識將眼光放遠，就算他日生意做唔住，要東山再起，甚至打返工，都係畢生難忘既寶貴經驗。

正正因為創業經驗，每點每滴都係錢。所以如果你仲係打工仔心態，就係浪費緊自己既青春同錢，係好不智既行為。打工出左事大不了唔做，有時為左開單，可以下巴輕輕應付左先，到時先算既心態。做左老細，通左天之後係好難有其他既公司會敢同你合作，因為生意既野，一定係儲客，人地係因為你個信譽先比生意你做，一個失誤，係可以好嚴重，你經唔起，人地更加經唔起。大家都係做生意，一個人因為一千幾百講大話，就注定左佢一生都係搵一千幾百既人，就算每個人心目中都有個價，都唔會係咁少錢既。

打算創業享福的，千萬別做生意！

窮生同好多年青創業家都有交流，發覺2年內失敗的人都有個共通點。就係佢地大多都係打算RUN順左就UN UN腳收錢既一群。

可能年輕人打工果陣見到老細都係好舒服，又有權力，指指點點好爽。但你地睇唔到佢地背後係冒幾大既風險同付出過幾多，今日先可以渣住杯咖啡點你做野。

當你立志要做老細既時候，你必先要明白，做生意係一場終生既競賽，你係同同業不停競爭較量。而你做得唔好，唔好話冇糧出，分分鐘輸身家。你唔會再有咩最低工資，最高工時，OT補水，有薪假期等等。而最重要既係，你冇返放工時間。窮生識好多老闆，一日做16-7個鐘。員工有得換更，佢係冇既。要享福？得，賣左盤生意佢。

所以想HEA？用果一百幾十萬玩下又好，買樓又好，唔好做生意，害己害人。