去旅行! 去到盡! 拆解年輕人的 欠債問題

一年遊日4次 夫妻欠債逾$20萬，呢個標題今日硬框框咁插落窮生對眼入面。窮生就好似有沙入眼一樣，睇到眼水都流埋。係窮生既世界，唔好話我本人，就連我認識既人，都唔會存在話去玩去到要欠債。到底點解會發生咁既事？

窮生係以前既文章<<理財專家不會教你-了解自己窮的屬性>>一文入面有提過，貧窮分三大屬性，消費系、家貧系同窮忙系。而今次因為由一單趣聞產生既討論，一年遊日4次搞到欠債，當然就係消費系啦！到底邊Ｄ人容易有消費系貧窮？又點樣可以改善？呢篇文可以救到你／你身邊既朋友。

係講消費之前，窮生想先用一段既篇幅講講欠債。係窮生既理財哲學入面，欠債唔一定係壞事，大家唔好對債務有太大反感，因為只有窮人先會怕欠債。有錢人係喜歡欠債的。咁點解人地冇事，而你有事呢？就要睇你點解欠債了！債務其實係深入你既生活，你用信用卡，你係欠債，你供樓，你係欠債幾百萬。你做生意要資金，你都會問銀行借錢。所以其實欠債只係手段，目的先係重點。有錢人欠債係為左投資，窮人欠債係為左消費。係呢十多年既日子，因為ＱＥ而產生既資產價格上升，如果你識得借，欠債反而會係你既朋友，而窮生可以話你地聽，借錢，一定一定唔可以借黎消費(簽一千幾百信用卡除外)，好似事主咁簽20萬黎去玩，絕對唔係一個成年人應有既行為，仲要已經係夫婦。

沒有家庭負擔，對日常支出沒有概念

我地只要上網睇下，不難發現而家因為消費而欠債既人多左，而且呢班人多數仲係30歲樓下既後生仔女。點解會咁呢？其實邏輯好易明，就係對支出冇概念。以前既人比較早獨立，廿幾歲，搵到份工想要私人空間，出黎一個人住既人唔少。佢地比例容易接觸經營家庭既知識，例如租金、食飯、坐車…好多生活細節都要自己去解決，自然佢地心中會有盤數，今個月要用幾多錢，食飯唔可以多過幾多錢。而新一代因為冇能力自住，好多人三十幾歲都係同家人住。自然對生活既野冇一個whole picture啦！所以300-500食餐飯，1-2萬去下旅行，只要還得起就可以。係冇生活壓力既情況下，慾望自然就會累積，好多人月入得萬幾，一星期2餐300-500既貴野係好平常既事。慾望得唔到抑制，就由月光，慢慢進化到欠債。

借錢容易，息也低

此外，係QE之後，全球都係低息環境。再加埋科技發達，有好多財務公司都可以唔洗露面就借到錢。用作消費既貸款一般唔需要好高，數萬元一次，你容易還，財仔都願意借。因為你唔係借一百幾十萬，你多數唔會走佬，風險系數咁低又有可觀既息收，財仔真係開到成行成市，只要你有份工，你好易就會跌入借錢還錢既永結輪迴之中。

太早覺得自己有能力用錢買時間

呢樣野係比較具體可以用數字解釋。簡單黎講就係由於父母由細到大幫你計劃太多，服侍亦都太好，令你好怕麻煩。趕少少就飛的啦，屋企亂？叫鐘點啦，投資？買基金搵人睇住啦。所有所有野你唔想麻煩，係資本主義社會都會有貼心既服務去幫到你，問題係要收錢。如果你已經累積到財富，你既時間可以產出更大既財富，你選擇用錢去處理自己唔會處理既事，我唔反對。但如果你只係一個廿歲出頭，月入皮幾兩皮既人。我得罪講句你根本冇資格咁做，而你根本就係應該做果Ｄ服務人既人。因為你既時間不及服務使用者值錢。最最最重要既係，如果你太早習慣用錢解決問題，就代表左你好早就停止左去學習點樣親自解決問題，咁久而久之你就會變廢人，到你冇錢果陣，你就只可以企係度喊。