讓數據教你理財—消費篇

雖然話每個人都係一個獨特故事，都有佢自己鍾意同唔鍾意既野。不過當大家抽離少少去睇呢個七百幾萬人既社會，其實人類多多少少係行為同喜好上都係有pattern。窮生係以前既文章都有講過窮生對消費上既理論同要留意既野，但由於一講到慳錢儲錢，都要有班人提出質疑，係唔係真係做到呀？咁！所以呢個系列就嘗試用數據既分析一下香港人既行為模式，分析完再作少少建議，第一篇我地先講消費/開支等問題！

以下數據根據:

睇睇下圖：

呢個係講緊唔同住戶人數既家庭開支分佈，由於香港家庭人口平均大約係2.8左右(最新數字)窮生主力想大家睇２人同3人家庭既數據。大家可以見到，無論２人定３人，大部分家庭既開支都係係１０Ｋ～２０Ｋ呢個數，都分別有接近34-35%。大家又可以計計數，由２人同３人大多數家庭都應該係住緊係1-2房的單位(尤其有子女相信住劏房比較困難)去到呢度我地大約都可以估到住屋開支，以租金計，一般最平既住宅單位租金大約係9K~12K左右視乎地區啦！我地又睇下另一幅圖，就會知窮生講得岩唔岩！

第二幅圖講緊既係，唔同住戶人數既家庭到底開支分佈係點呢？原來３人家庭(多數係父母+子女)既平均開支係$26918。咁呢$26918佢地係點用既呢？

住屋開支佔比最高！香港人好鍾意出街食飯？

香港樓貴就係人都知，樓價帶動租金上升，雖然租金一直都追唔到樓價既升幅，但係貴始終係貴，開支排頭位大家都應該估到係住屋！但一如窮生所料，以2-3人家庭計住屋開支都係係$9445~9600，差距不大，是兩房單位的價錢！但係有趣既人第二位既食品，竟然都佔開支接近30%！3個家庭一個月洗成差唔多8K係食方面？

統計處好貼心，計埋在家食同出街食既比例，發現香港人真係好鍾意出街食飯，以一個３人家庭做例，照計２人工作，返工食LUNCH計都係1K左右一個人每月。姐係話係一個月入面，我以一餐１人＄１００計。佢地就有十餐晚餐係出街食。以一個有仔女既家庭黎講真係幾多。而係月洗５Ｋ外出食飯之後，仲有$2719係在家食／買食品類商品。係呢方面既開支就的確係可以減一減了。

有小朋友洗多幾多？

如果要睇養小朋友，睇上面個圖係唔得。因為上面就算係３人既家庭，都可能係３個都係大人(可能仔女都大)。我地又睇下呢個圖：

呢個圖係講有收入既家庭成員既人數計開支，咁我地睇２人就會準少少了！

習慣用錢解決問題，開支成無底深潭

大家睇到呢個２人開支比頭先冇分有冇收入既３人家庭更多，超過左３萬開支！原因可能係住戶有多過１個小朋友／夾心族啦！所以你見２人個全屋開支已經過萬。但係香港人係咁既情況，都仲會好肯花錢係食，而仲有趣既地方係，呢Ｄ家庭平均一年會花超過12K元去置裝！而交通好明顯係因為有部分人買左車而令個數拉左上去既！

窮生係同大家談論消費既時候都再三強調，浪費係重要，仲唔少係必要。但係你要分清楚咩係需要(need)同想要(want)。而且唔單單係橫向黎分（消費類別）黎分，仲要睇埋縱向（消費水平）。

簡單既例子就係，食野係需要(need)，但食放題就係想要(want)。又例如小朋友讀書係需要(need)，上十九幾個興趣班，搵工人貼身照顧，去國際學校係想要(want)。唔係唔可以咁，而係你要識得分呢兩者，並將自己呢２條數分開計。先計左自己係純need既情況之下要用幾多錢。再另外加一部分for你既want。而唔係混埋一齊黎計，咁樣就唔會令你無聲無色買左好多唔用又唔係真正想得到既野。

魔鬼永遠在細節

睇完圖表，窮生想提大家既係，縱然住屋開支係好貴，但佢係個死數，你可以改變既野唔多，亦都易去控制。加$1000租你一定會知，想平d可以有咩地方揀，係易去走盞。相反，一d睇起上黎可以$100-200，$300-$400既消費，就分分鐘侵食緊你既自由之路！一季買2-3k既衫，買下鞋又買下化妝品，男人換下波鞋，追下電子野。一年分分鐘係２萬for呢d野。唔係叫大家唔好買野，而家你要先了解自己用左幾多錢for呢d野。再問下自己值唔值得，起碼當我問你呢一年洗左幾多錢買衫既時候，你答到我，甚至就算係具體唔知，當窮生計比你睇之後你都唔好一面驚訝，死左都唔知咩事咁款。