生涯規劃的常犯錯誤（25-35歲）

又係突然插隊既文章，文章的起源係窮生早前係輔人睇左篇題為＜＜慳啲洗又點？慳啲洗就買到樓咩？＞＞為題既文章，文章拋出左幾個問題，筆者用佢自己既角度去解答。當中都發現有幾個生涯規劃常犯錯誤，就等窮生一一解答一下。

係解答之前先要講少少，生涯規劃呢個TERMS係呢幾年開始係香港再次興起,原因可能係某局長既一番話。事實上生涯規劃係重要，因為人一生短短地都有７０年。頭２０年成長學習，２０－４０應用打拼。５０－７０收成享受。講係簡單，如何實行？沒有生涯規劃恐怕很難。以香港社會為例，２２歲大學畢業，我當２５歲事業方向開始明確少少到升職，拍拖，結婚，生仔等等，大多都會係25-35歲之間完前。姐係話你人生既輪廓如果係順利的話會係３５歲左右開始定下來，之後做既野係ＢＡＳＥ　ＯＮ呢個輪廓去發展下去。可見呢１０年功夫有多重要。

問題一：「結婚平有平結，貴有貴結嘅啫，就咁簽張紙咪得囉！」

呢個說話絕對冇錯既，不過學６８９話齋：「係會展擺１００圍同５００蚊簽張紙之間仲有好多空間。」問題係你要知道自己有幾多斤兩。

首先你大約要知道一般去行既結婚程序要洗你幾多錢，以一場有行禮有擺酒，有片有相有日本蜜月既套餐計，扣埋收入都要洗大約十幾廿萬。當中最勁就係擺酒同行禮。

雖則結婚係兩個人既事（外母同奶奶），但係洗錢既就係而家最冇財力既年青人。窮生不嬲都係用者自負，邊個想擺就邊個俾錢。結婚呢Ｄ所謂儀式其實就係你一生入面，俾機會你扮一次主角，去做一場戲。就好似Ｄ富二代自己開戲俾自己做主角，自己出隻冇人買既ＣＤ一樣。呢Ｄ野完全係消費性的動作。點解要做呢？

至於文中提到結婚一生人一次，起碼都要影返輯結婚相留念啦！窮生覺得影相既野真係豐儉由人，窮生有同事會去京都預支蜜月，親自操刀影相。溫馨得黎又收留念之效，成本一定比出面影平得多。而窮生作為廣告行人士我可以話你聽，出國收得平既人都唔會影得到咩好野出黎，不如自己影。

總結一句，做人要有自知之明，冇咁大個頭就唔好帶咁大頂帽。因為結婚搞得大，就會郁到其他規劃既情況惡化，下面會提到。

問題二：「是但租間屋先，然後結婚生仔，三個人排公屋囉！」

呢個問題足見生涯規劃的重要，講返上面結婚問題，如果你唔擺酒，多出黎果廿萬就可以加大購買力。文章作者話自己一年１萬我當佢３０歲計，如果你２２歲做野，３０歲都應該有５０萬？我當你一年升幾十萬，而家一個上車盤都係４００萬，你同你未來老公如果一早有計劃。根本唔洗問呢個問題，一結婚可以直接買樓上車，仲洗乜煩？

而上一段講到既結婚搞得大既後果係呢個時候就湧現，好多人有個常犯錯誤覺得，一層樓平平地都要４００萬，我呢十零萬左右到Ｄ咩？儲錢有咩用？答案係好有用。以一個４００萬樓計，９成上車連雜費大約５０－６０萬入場。１０萬姐係１／５。你無啦啦多左１／５上車資金你唔用黎裝修，唔買大Ｄ。要黎一晚洗左佢？

至於公屋就係第２個世界既事，如果你可以排到隊，基本上你同上車冇關。而上公屋除非你生返２－３個，否則你呢世都排唔到，係呢度都唔討論太多。

另外我想講講就係所謂買樓唔係買棵菜理論。因為窮生係２４－５歲果陣都瀨過野。就係當年窮生睇中左一個４００呎單位佢開我３５０萬，經紀已經提我你係岩就開票俾人地先可以同你傾價錢。由於當年我太幼稚，行動力又唔夠。係咁話不如睇多幾間先。去到最後２０１７年佢升左１００萬。

今日我可以問返你，到底你所謂唔可以求其買，係你要考慮Ｄ咩？Ｄ考量係咪真係合理呢？定係單純只係好怕做錯決定而遲遲立唔定決心？如果你係自住，佢升唔升你都要住。如果你早少少有首期，交租唔會比供樓平。所謂比層樓綁死幾廿年。難度你唔係月月交租？冇同一個生活壓力咩？我供樓當１５Ｋ月供，十年後我都係１５Ｋ甚至更少。十年後你交既租必定比十年前多。邊個先係唔自由呢？

最後一句講到因為自住，要考慮返地點，配套，同埋一堆其他嘢。都係果句，做人要有自知之明，有錢就有考慮既空間囉。衰Ｄ講你著草過台灣都要球半啦。唔好扮有野考慮，有能力先有考慮既餘地。

問題三：「有仔襯嫩生呀，平有平養，貴有貴養啫。」

題外話，早生個小朋友會聰明啲係冇科學根據。窮生媽媽都係３７歲先生窮生。

事實小朋友呢個ＦＡＣＴＯＲ造就最多窮忙中產。因為大家都冇異議地將最好的都留俾小朋友。兩條友加埋搵６－７萬就話要送佢去國際學校，一個月洗幾千蚊比佢學呢樣學果樣。你問我咁樣有咩問題？窮生就答你冇問題，仔係你既，你要點教外人冇權過問，但窮忙中產就不要怨了，簡單道理，想供多Ｄ俾小朋友？博命搵多Ｄ錢囉。

窮生冇生小孩既打算，真係有左都會俾多Ｄ空間佢自由發展。睇住黎洗，絕不怪獸。

而冇人叫你買樓生仔一齊做，起碼如果冇能力，買樓頭３年都唔好生住。

問題四：「問阿爸阿媽借首期囉，之後再慢慢還。」

呢個窮生冇親身經驗，因為窮生家窮。但我唔明點解文中講到父母要俾幾百個你地上車，事實上係完全唔幫手同full pay送層樓俾你地之間，又係有好多空間。一個首期都係４０萬左右，４０萬得唔得呢？冇４０，２０都好架。再講你都係借，借銀行又係借，咪計返息俾父母囉。到第時老左有病，佢地唔係要錢傍身，係要你傍身呀！呢Ｄ中國式思維真係要戒。而最大問題就係，咁自己唔爭氣，有乜計？

最後完全又係人生窮得只剩下買樓，買唔到樓就好似人生已完咁。說穿了就唔係唔想做樓奴，係冇資格做。有得做都係甘心去做。呢個就係呢代香港人既寫照。原來享受人生就係一年去１－２次旅行，食下好西，真係好無趣。

當窮生一叫人儲錢，就好多人將我同奴性掛勾。我想問下，你唔儲錢，俾你日日食好西，一年去４次日本又點？呢Ｄ叫自由自在？咩令你可以ＫＥＥＰ住做呢Ｄ野，咪就係返工囉！到頭來又係不停惡性循環。呢Ｄ真係叫自由？不如早Ｄ儲錢，簡單生活，早日財務自由，咁就真係可以做到自由人生喇！