創業要錢，也要戒掉打工仔心態。

早前有網友主動pm窮生，想窮生講下創業有關既題目。好！我之後陸續都會出下一ｄ有關創業既技巧文章，等大家多條出路可以考慮下。不過今日我地先要講講做一個創業者最先要有既心態之一。就係你要首先戒掉打工仔心態，起碼就係唔該你對住你份工以外既野唔好keep住呢種心態去應付。

首先打工仔點解會有打工仔心態呢?最緊要係源於月薪制度，你個個人都出同一份糧。公司唔會因為你做得多野而加人工俾你，好唔好表現呢Ｄ更加係難量化。所以慢慢形成左所以＜＜茄呢啡心理＞＞。簡單黎講就係，我出現左，我就要出糧。呢樣野你返工咁諗都無可厚非，但如果係搞生意或者處理你個人既事務，你又習慣左呢個心態，就真係好危險了！

事關好多人返工根本唔係想做好件事，佢只係想唔做唔錯而已。所以係公司做野既方法一定係唔好孭鑊，因此個責任既流向對打工仔最為重要！而做生意，利益係最大既推動力，賺$100就袋$100，但同時虧$100都係自己受哂，責任自負！所以做野係以最減成本達到最高效果為大前題，日日做野都要以如何改進黎做原則，只要唔犯法，唔虧本，冇咩係唔可以做既！

除此之外，打工仔同創業者其中一個最唔同既心態就係，打工仔因為出開糧，所以好習慣Ｄ野立即有回報。創業者好多時一開始都用左一大筆資金去做Start up，頭一段日子可能都要守。守得耐會開始驚，開始懷疑。其實打工仔轉做創業者，第一樣野就要明白，公司係資產，Start up既成本係買左資產，唔係全部都係支出黎既。點令到資產升值先係重點。所有Start up都要個回本期，有ｄ短到２－３個月，有ｄ長達數年。唔好輸左２－３個月錢就開始驚，咁只係代表你係創業之前冇做好資料搜集，冇計好數先出手。

此外，創業者也要戒掉以前打工仔專職專做的心態，唔好以為自己開左間公司，做左老闆就樣樣野都可以指人。你有一千幾百萬都尚且可以請人返黎，以前你打工可以覺得老細好hea好威，人地捱大間公司果陣你唔知姐！做左老闆，基本上係冇放工時間，亦都冇分咩職責。總之所有公司既野都關你事，冇起人上黎洗廁所你都要親力親為！同時唔好覺得自己讀好多書，有ｄ咩專業技能創業就冇有怕，出黎創業多數有既困難都唔係技術，而係人脈同好多以前你好睇唔起既濕碎問題！唔好怕麻煩，因為假設你以前你做廚師，而家你做左餐廳老闆，你既主要職責就唔係炒好碟野，而家令公司運作暢順，有營利！亦都千萬不要下下求最大回報，因為要快一定係炒股票快。創業係講可持續性，公司運作暢順係最緊要，做起左個量，錢就自己穩定增長，虧頭賺尾，呢ｄ一切想法都同打工仔心態背道而馳，一日唔戒，一日都只能夠打工。