你唔會做樓奴，點解你咁貼市？

窮生身為80年代未期出世，身邊朋友出黎食飯既話題除左女之外當然係結婚(都係女)、同買樓(起碼係住屋)問題。如果你係80-90後，你身邊一定會有2-3個朋友一聽到就會暗串你：「儲成球黎上車，打工供死一世就係為左個300-400呎單位，我就唔會咁笨玩上一代既遊戲。」其實窮生已經聽過超過100次呢d說話，我已經冇哂感覺。不過當同網友分享下都冇壞，講下窮生對樓既想法俾大家聽。

窮生係會買樓既人黎，窮生第一次有買樓呢個念頭，就係2011年。果陣我出黎做野冇幾耐，有朋友介紹我係屯門上車，果陣因為一時年少無知，睇完走左寶就錯過左大好既上車機會，果陣要上車不過要廿萬左右。窮生覺得人總要有地方住，而租同買既分別只係多左筆首期。咁我睇唔到點解要租。係世界低息大勢之下，香港又有最低工資。只要你仲有野做，基本上都唔會無啦啦俾人call loan。窮生從來冇動搖過買層樓住，甚至投資。

但上面呢d朋友好奇怪，佢一味話你ｏｎ＿做乜咁慳唔換電話唔去旅行去為層樓，一邊佢面書就充滿左有關樓市既新聞同post，呢１年樓價下跌，你會見到佢好似睇馬咁興奮。邊個區，咩呎數既單位跌得多佢都好了解。我同佢既分別只係，我有去睇樓而佢冇。到底佢個心係諗咩既呢？

其實窮生寫文講理財，係想大家做個有Planning，了解自己既人。你可以唔買樓，但你唔可以唔知/唔承認你想要咩。而無論你想要咩，有一定數量既錢都係必要既！好似好多人一見到個樓市跌就好開心，不停話d蝕讓既業主抵死。其實你有冇諗過，樓市跌到幾多你先會由開心變成擔心？不停希望黎多次沙士既後生仔，比你下年望到，樓市跌一半，你又有冇錢買呢？真係黎多次沙士，香港經濟仆到直一直，你有幾十萬係手，你又敢唔敢上車呢？呢一切一切，如果你有計劃，你有聽窮生講有儲錢，你幾時都可以買樓。

老土d講句，機會係留返俾有準備既人，我呢位朋友口裡說不，身體卻很誠實。如果佢有錢，佢一定第一個去買樓，奈何因為好多原因，因為租左樓，因為要去旅行而月月洗清光。係世界出現左ＱＥ(量化寬鬆)之後，樓價已經好難去返以前百多萬就有呢枝歌仔唱。以而家個市黎睇，再下調多1-2成已經係好唔錯既入市時機，呢段跌既時期睇怕都會有最少3-5年。以歷史黎講樓市係跟實體經濟黎行，呢３年大家要好好儲錢過寒冬。比起成日想黎多次沙士呢d咁冇人性既想法，先有少少錢係身先有資格話人地係樓奴，就算有一日出現左１００萬一層樓，如果你連１０萬都冇係身，你都係買唔到。而家香港好多人都好有購買力，廿多歲就算不靠父幹閒閒地揸住一百幾十萬資產既人一街都係，最緊要係有一手準備。否則，你就一世幫樓奴打工了。