你係窮忙族?其實唔係冇原因。

窮忙族呢個Terms係呢5-6年開始盛行，講既係一班明明有工做，日日都好忙，營營役役為事業打拚既人。但係呢班人偏偏就係得唔到相應既回報，用左人生大部分時間做所謂賺錢既事，到頭來扣除哂生活開支，佢得剩既其實唔多，呢種生存而非生活既狀態，我地叫做「窮忙」。

係香港社會黎講，因為成個勞動力既結構都唔同左，冇左以前一份工打一世呢枝歌仔唱。換返黎既有好有唔好。好既就係，係０３年失業率見頂之後去到而家。我地基本上係全民就業，香港地要搵份工黎講而家都可以算數一數二地唔難既年代。但係轉黎既就係另一個以前冇既問題，就係「在職貧窮」。呢個問題其實係初畢業出黎既時候好常見，唔少廿頭既年輕人，甚至未畢業既「準社會人」都有曾經私下搵窮生傾訴，大嘆對未來既絕望，覺得自己係月月清既窮忙族。見到呢類朋友，我多數都係回答：

「真係唔洗太擔心，因為大部分人起薪點都唔係差好多，都係萬頭到萬中。你比心機捱多３—４年，睇到時咩情況先算都未遲。」

其實窮生唔係HEA大家，事關窮生係以前既文都講過，起薪點真係唔係太重要。睇收入最少都睇多幾年，根據返自己行業既市價作出比較。如果係好在意自己收入既人，應該要避免入一D出左名乞食既行業。之後先按年評估一下自己有冇UNDERPAID。單睇起薪其實冇乜意思，眼光亦唔應該係咁短淺，一個月多２千係唔會令你識飛既！

但如好似窮生咁上下廿尾既年紀，大家都出左黎做左幾年野，人工一來會因為行業或者職級而有比較大既分野（可以差幾萬蚊）。另一面你都會見到因為呢幾年既資產累積既不同，而令到成個生活質素都起左好大變化，如果你係你朋友當中比較差既一群，到底有咩野令人跌入窮忙呢？以下幾點可能你要自己審視一下。

工作很累
好多人畢業出黎都好多理想，好多野想做，好想改變呢個世界。但出黎做野幾年，果種無力感令人磨滅意志。咁樣會令你對工作既投入程度有影響，自然影響你既表現/際遇同人工，因為放工已經好累，已經唔想再諗野，自然令你唔能夠發展工作以外既其他可能性，於是你就會除左份工之外乜野都冇，窮生都講左好多次，呢一代人係冇可能單靠一份工作而向上流。一定要多元發展，而要做到多元發展，就一定要係生活上感覺鬆容，千萬不能令自己頹下去。

愈窮愈辛苦就愈想要物質享受
正如之前所講，放工已經好累，已經唔想再諗野，好想放鬆下個人。香港人RELAX既方法就係得2個——食！旅行！。旅行動輒萬元不在話下，一年２轉日本會冇３皮野。食野以香港計夜晚食好少少都３舊水一位，一個月６—７轉都２千。一年又多謝２皮，一年咁ＣＡＰ左５皮真係令你生活上放鬆左？其實咁樣同吸毒一樣，係冇解決到問題，反而令你不能按年加大呢方面開支，令你愈來愈窮，愈來愈會為錢發愁。

沒有冒險的本錢
呢個係以上２點既後果，因為好多唔同既因素令你冇辦法累積資產，一個月開支最少都幾千，家用幾千，唔好講話你仲要交租養車，一大堆生活上既開支。係你冇累積資產既情況，你有冇能力去諗冒險？唔好講到創業咁遠，你就係連慢慢搵一份待遇同職位都好Ｄ既工既本錢都冇。窮生係２年前曾經感覺當時的工作太困身，壓力也過大而辭職休息了２個月。係呢２個月窮生沒有頹廢地HEA，每天做運動，三餐自己親自下廚，仲去左日本玩。毫不緊張地每天細心留意有沒有好工出現，去做準備工夫，精神飽滿地去見工。如果窮生沒有穩健的資產狀況，又點可能係唔斷家用同KEEP住生活質素既情況下揀工？
冇本錢的人，結果你會因為下個月既開支而play safe。不停在同一堆沒有出路既工作之中游走，過多十年，你最有本錢既時間已經流走，又發覺身邊的朋友已經爬到相當不錯既位置，到時你每日既主要任務就係，學識點樣叫自己唔好比較。