你係「搵錢向」定「儲錢向」?

睇得耐窮生D文既人，或多或少都係覺醒係香港要活得有尊嚴，有Ｄ錢旁下身係走唔甩既！但當你睇到呢個題目果陣，你可能會話：「乜搵錢同儲錢有衝突既咩？」大家唔好做標題黨住，好似蘇民峰批命咁，佢出名係自創寒熱命論，將人分為寒命、熱命、平命。窮生亦有類似理論，不過就科學得多喇！窮生所講既係你係儲錢先決定係搵錢先決。窮生點解會寫呢個topic呢?因為窮生最近開始收到好多網友既inbox，分享自己既情況同交流下理財心得。有好多人同窮生傾計，聽到好多窮生既野之後都會覺得，我都要好似窮生咁做先得。我一聽到呢ｄ野，我都會立即應該一句，其實人人想要既野都唔同，我果套未必岩你地用，窮生寫文係希望大家多ｄ了解自己既需要同專長，由窮生既文章悟出一條自己既理財之路！

入正題之前，我要首先定義返呢兩類人。搵錢人顧名思義姐係以搵好多錢為目標，努力工作，諗方法令自己既收入增加而再上流既人。呢類人香港其實好多，因為香港始終係一個資本主義既社會。係社會努力鼓勵消費既氣氛之下，呢類人有好多野想擁有，好多好多唔同既目標同理想希望達到，所以好難係唔涉及到錢。所以，呢類人咩野有錢搵既機會都唔會放過既，都係推動香港競爭力既一群。係消費主義既誘惑之下，慾望會推動你唔介意努力工作去支持你既高消費活動。所以呢D人既理財方法要進取D，除左工作之外，需要一Ｄ副業同進取Ｄ既投資組合去支持，窮生會建議佢地搵多Ｄ「主動收入」，「主動收入」好處係回報較高，有機會發達，而家比較能夠控制！主要係開拓自己既事業，分分鐘可以全職做老細。唔好處就係會好困身，因為工作就一定會佔用時間，要發達就要付出生活同愛情既時間，而風險都會較高。所以喜歡向前衝既人都要考慮清楚，唔好睇見人成功就去，睇唔到９９％輸左既人幾慘呀！

而儲錢人即係以防饑為主要任務既一班人，佢地覺得自由時間比較重要，錢都要搵但係唔可以好困身，唔會因為想搵多幾個錢而放棄自己/朋友/家人一齊既時間。比起有好多好多野想做既搵錢人，佢地大多係好多野都唔想做。佢地都可能會想辦法搵多少少錢黎儲，但大前題係唔影響自己既work life balance。呢Ｄ人本身物慾唔會好強，大部分既興趣都唔係要用好多錢，反而要好多心機同時間。係咁既情況佢地就會不時覺得自己份工好困身，如果佢地理財好既話，佢地多數就算唔係搵好多錢都好，都會想辦法儲定Ｄ錢。由於呢Ｄ人本身用既錢唔多，出黎做野幾年都會儲到唔少錢，係比較以不變應萬變既生活方式！呢類人應該返法以現有資金黎增加「被動收入」，例如投資股票、債劵、車位甚至房地產。以香港人最愛既住宅單位為例，如果你可以係５０歲前擁有２個住宅物業係手，咁你下半世都唔會餓死先。心力就可以放係其他興趣上面了，「被動收入」好處係彈性大，不會太困身，只要有好既計畫，你可以同時有好多唔同既「被動收入」來源，而且「被動收入」係可以長期運行，到你９０歲你只要唔死／腦退化，你一樣可以ＲＵＮ落去！唔好處就係回報多數比較慢，而且如果你既主動收入（你份工）唔夠多的話，要小心輸入肉，本金冇左好難回氣的。

睇完窮生對以上兩種人既陳述，可能你自己心入面已經有答案自己係邊類人。咁大家就應該跟返自己既方向好好定下自己既理財哲學，唔需要強行學習人地所謂既成功例子，到頭來可能唔成功而自己白白辛苦一段長時間。不過無論你係邊類人都好，都有一樣野唔可以唔做，就係時刻用腦，去計劃，去學習。唔好以為「被動收入」叫「被動」就唔洗用心經營，呢個世界最鍾意懲罰Ｄ唔用腦既人，大家一定要記住呢點。